Shillong, Naiwieng, 15: Watla ki tiket ki rem hynrei ka tamasa Cherry Blossom mynta u snem ka la khring ïa ki paidbah na kylleng ki jylla ka ri India bad khamtam na ki jylla ka thaiñ Shatei Lammihngi ban sakhi ïa ki nongrwai kiba wan kyrpang nabar ka ri India ban pynlynguh ha kane ka tamasa kaba ar sngi.
Ha ka tamasa Cherry Blossom, mynta u snem ka khlur jong ka Bollywood ka Nora Fatehi ka la pynshongshit ïa ki paidbah da ki jingshad ba jem syngkai jong ka bad u Jason Derulo. Sa ka kynhun rwai The Script, nabar ri, ka kynhun rwai Aqua, u Diplo bad u Tyga, ki la nang pynsngewbang shuh shuh ïa ki paidbah kiba ïashim bynta lang ban kynud ïa ki kyntien jingrwai.
Ka jingïohnong jong ka Sorkar na kaba pynlong ïa kane ka tamasa ka long ka bym kai namarba ka kamai na ka ïoh lum pisa na ki nongwan kai kiba leit shang suwari ruh sha kylleng ki jaka jngohkai pyrthei kiba don ha ka jylla. Kane ka la nang kyntiew shuh shuh ïa ka kamai kamai wat ïa ki nongshong shnong trai jylla kiba buh ïa ki ïing basa, ki nongñiah taksi, ki restaurant, ki Cafe bad ki nongbuh dukan.
Kane ka tamasa ka la rah ruh ïa ka dur jong ka jylla Meghalaya hakhmat kiei pat ki jylla jong ka ri India namarba ka Shillong ka la pawnam lypa naduh ki snem ba la leit noh kum ka ‘Rock Capital” da ka jingwan iuhkjat jong ki nongrwai bad ki kynhun tem na bapawnam nabar ri, nalor ba ka Jylla Meghalaya ka dei ka jaka kaba pyngngad kaba baroh kiba la wan iuhkjat kim lah khlem da ïaroh ïa ka jingitynnat jong ki lum ki them ha kane ka jylla.
Na kane ka tamasa, ka pynkha ruh ïa ki lad aikam ïa ki samla, ki kam ba ar sngi ne lai snem wat haduh shitaiew namar ba ki nongpynïaid ki donkam ïa ki nongtrei.
Ka jingpynlut pisa jong ki paidbah ha kum kine ki tamasa ka jur bha bad ka jingïohnong jong ki nongpynïaid ïa ka tamasa ruh ka kiew bha bad dei na kane ka daw ba ka Sorkar ruh ka pynshlur ban pynlong ïa kine ki tamasa manla u snem. Ka jingïohkam jong ki samla kum ki Volunteers, ki Security Staff ne ki Ground Crew. Sa ki kynhun tem rwai na ka jylla ruh ki ïohlad ban pyni ïa la ka jong ka sap ka phong ha kine ki rynsan kiba heh.
Na ka jingpynlong ïa ka tamasa ha dohnud ka sor Shillong ki don ruh ki jingkhñium jong ki nongleit nongwan namar ka jingdheng kali ka long kaba jur bha namarba ki surok na baroh ki liang kiba mih sha JN Stadium la pynbna kum ki “No Entry.” Lehse ka tnat Pulit kan jin da la peit bha ïa kane ruh kawei ka jingeh khnang ba kan pynsuk lang ïa ki paidbah ki bym leit sha ka tamasa bad ïa kiba leit sha ka tamasa.
