Watla ngi la shah ieh khunswet ruh ngin nym duh jingkyrmen ban pynkhlaiñ ïa ka party : President PDF Mawkyrwat

Mawkyrwat, Nohprah, 13: U President jong ka People’s Democratic Party (PDF) Mawkyrwat Zonal Committee, u bah Maiantis Lyngkhoi haba kren ha ki lad pathai khubor hadien ka jingïalang ha Phyllaw ïing jong u, u la ong ba watla ka party PDF ka la shah ieh khunswet ha kine ki khyndiat bnai ba la dep hynrei kan nym duh jingkyrmen pynban kan nangtrei shitom ban pynkhlaiñ ïa ka jingtreikam.
Haba bynrap shuh shuh ïa ka jingkren ba naduh ba sdang kum ka party ka la i don jingkyrmen namar da ka jingwan pynïasnoh jong uwei na ki ‘riew rangbah u bah Sounder Stong Cajee ha kane ka party PDF hynrei na ka daw ba ka jingduna ha kiba bun ki bynta tang ha ki khyndiat bnai jong ka rung u la phet noh sa kawei pat ka party kata sha ka Trinamool Congress bad u la ieh noh shadien ïa ka PDF. “Ïa kane ka jingrung jingmih jong ki nongïalam ngam da sngewpher namar ha ka politics hi ka shait long kumta ki don kiba rung ki don kiba mih noh”, la pynpaw u President ka PDF Mawkyrwat Zonal Committee.
Shuh shuh haba kren pat ha kaba ïa dei bad ka MLA Election 2023, u Maiantis Lyngkhoi u la ong ba kum ka party haduh mynta hi kam shym don la u jong u kyrtong hynrei kan sa leit ban ai jingkyrshan ïa kiwei pat bad ïa kata rai ban leit kyrshan ïa kiwei pat ki kyrtong ym pat lah ban pynpaw namar kum ki nongïalam jong ka party PDF kin hap ban da ïa thir sani bha lyngba ka jingleit pynsngewthuh ha ki nongkyrshan kiba don ha ki shnong ki thaw.
U la kren ruh khyndiat shaphang ki rukom treikam jong ka party bad ki jingthmu kiba don ha ka ha kaba ka party ka don ha ka ban kyntiew ïa ka kam rep kam riang, ka kam ïalehkai bad kiwei de ki kam lyngba ka jingdon ïa u Myntri jong ka tnad kam rep kam riang, u bah Banteidor Lyngdoh.
Ha kawei pat ka liang u la ong ba watla ka party kam don ïa u kyrtong ha kane ka MLA Election hynrei ka don pat ïa ki kam ban pynkhlaiñ na ka bynta ban pynkhreh pat ban sei ïa la u jong u kyrtong ha ka MDC Election jong u snem 2024 khnang ba ka party kan nym duh ïa ki briew ban long ki nongkyrshan.
Ha kane ka sngi la ïoh ruh ban pynskhem ïa ki nongkitkam ba thymmai jong ka People’s Democratic Front (PDF) Youth’s Wing ha kaba u Fidestar Wanniang kum u President bad u bah Comfort Syiemlieh kum u General Secretary. Katba ki nongkitkam jong ka PDF Women’s Wing ki long President ka Sitsina Marweiñ bad General Secretary ka Alphadalin Lyngdoh.
Kiba ïadonlang ha kane ka sngi ki long naduh ki samla, ki longkpa bad ki longkmie na kylleng ki jaka bad ki shnong.