Watla ki Liang Pyrshah ki ong ba ka sorkar kan ym neh, hynrei ngi la pyndep pura ïa ka samoi : Conrad

Shillong, ïaïong 01: U Myntri Rangbah ka jylla u Conrad Sangma u la ong ba ki Liang pyrshah kila ong ba ka kynhun synrop jong ka sorkar kan neh tang 2 bnai, hadien 6 bnai, hadien shisnem hynrei ngi la lah ban pyndep ïa ka samoi ba pura.
“Ha u 2023, ki paidbah ka Meghalaya kila ai biang ka jingshaniah ha ngi bad ngi la lah ban thaw ïa ka Sorkar bad ngin sa pyndep ruh ïa kane ka samoi ryngkat ka jingjop,” ula ong daba bynrap, “Hadien bun phew snem, ka la don ka Sorkar kaba skhem hapoh ka Jylla bad ki dang don shibun ki kam kiba hap leh na ka bynta ka jylla bad ki briew jong ngi”.
Ha kaba iadei bad ka jinglong jingman bad ka suk ka saiñ ha Jylla, u Myntri Rangbah u ong, “Ha kiba bun ki khep, ngi la mad ïa ki jingeh na ki jingmih ki jingkulmar hynrei ngi la lah pat ban tem ïa ki. Ngi don bun ki jaitbynriew hangne ha Jylla bad kam long kaba suk ban donlang baroh hynrei ngi la pynthikna ban bat ïa ka bha ka miat ki briew jong ngi bad ban ai ka jingsynshar kaba biang”.
Ha kane ka prokram kaba dang ïaid bha ka jingïakren bad ha kajuh ka por ba ki riew ngeit Muslim ki dang mane Adhan ha ka Mosque ba marjan, kaba pynlong ïa u Myntri Rangbah ka Jylla ban pynsangeh ïa ka jingkren haduh ban da dep ka Adhan (Azan).
Haba bteng ïa ka jingkren u Myntri Rangbah u la ïathuh ruh shaphang New Shillong Township, ula ong ba shuwa jong ka ilekshon, ka Sorkar NPP ka la pynbna ïa ka song pisa ba T. 10,000 klur ban shna ïa ki surok, pynbiang umbam umdih, ki ophis treikam bad ka Knowledge city ha New Shillong Township.
Haba kyrpad ïa ki paidbah ba kin vote ïa ka kyrtong ka NPP Dr M Ampareen Lyngdoh, ula ong, “Ka Kong Ampareen ka dei ka kyrtong kaba biang eh ban mihkhmat ïa ka Jylla ha Parliament. Kan sa kren na ka bynta ki briew jong ngi. Ka Sorkar NDA kan wan biang ha ka bor ha Delhi bad ka long kaba kongsan ba ngin don ka kyrtong NDA ban shah jied napoh ka Jylla. Ka NPP ha ka Jylla bad ka NDA ha ka Sorkar Pdeng, kan pynlah ïa ki ban treikam ryngkat ryngkat bad pynthikna ïa ka roi ka san jong ka Jylla”.