Watla ki jinghikai ki long khlem jingsiew hynrei long kiba siewspah ïa ka por : M. War

Mawkyrwat, Naiwieng, 07: Ka Gracy & Co. Institute of Information Technology (GCIIT) Society, Mawkyrwat ryngkat ka District Commerce & Industries Centres (DCIC), South West Khasi Hills District ka la ïoh ban plie biang ïa ka shlem ai jinghikai ne ka Training sa ha ka bhah kaba san (5th Batch Training) na ka bynta ki samla shynrang bad kynthei ba kin ïoh jingpyntbit ha ka Electronics bad ka Electrical Appliances Repairing (E&EAR) ha kaba ïa ka jingïalang la pynlong ha GCIITs’ Training Centre, Mawkyrwat, South West Khasi Hills District.
Lah ban kdew ba ïa kane ka prokram ne ka jingai jinghikai ka dei hapoh ka jong ka skhim Raising & Accelerating MSME Performance (RAMP) ba la bei tyngka da ka World Bank. Kumta, ki samla ki ban sa shah hikai ne shah pyntbit ki don baroh 50 ngut kata ha ka Electronic Appliance Repairing ki don 25 ngut ki samla bad ha ka Electrical Appliance Repairing ruh ki don 25 ngut ki samla bad ka jingai jinghikai na ka bynta jong ki kan long tang hapoh 15 sngi.
Kum ban shu pynkynmaw ba ïa ka Gracy & Co. Institute of Information Technology ne ka GCIIT Society, Mawkyrwat la sdang ïa ka naduh u 11 tarik u Kyllalyngkot, 2011 bad mynta ka la nang ïaid shaphrang ha kaba la sdang ban buh ki jaka ai jinghikai ha ki jaka bapher bapher ba ki samla shynrang bad kynthei ki ïoh ban leit shah hikai.
Ha ka jingkren jong u bah M. War, General Manager jong ka District Commerce & Industries Centres (DCIC), South West Khasi Hills District u la pynkynmaw ïa ki samla shynrang bad kynthei ba kum kine ki jait jinghikai na ka liang ka sorkar ka la buh bad bynta ban ai jinghikai ei ne free. Kumta u la ong ba kum ki samla haba ki wan sha kine ki jait jinghikai ne training watla lada ki ïoh ei ruh kim dei ban kheiñ stieng hynrei ki dei ban shimkhia da kaba siew spah ruh ïa ka por jong ki namar lada kim leh kumta ki lah ban shah pynduh ne shah pynduh ïa ki jaka ai jinghikai.
U V. Agarwal, Consultant jong ka Raising & Accelerating MSME Performance (RAMP) u la pynkynmaw ba ka sorkar India haba ka thaw ïa ki lad jingai jinghikai na ka bynta ki samla ha ki shnong bapher bapher ka don la ka jingthmu bad kata ka long ban kyntiew bad ban ai mynsiem ïa ki samla ba kin nym long ki samla ki bym treikam hynrei kin long kita ki samla kiba lah ban ïeng ha la ki jong ki kjat khnang ba kin lah ban kyrshan ïa lade bad na ka bynta kiwei ruh.
U la ai mynsiem na ka bynta jong ki samla kiba don ka jingthmu ban pyndep ha ka Electronics bad ka Electrical Appliances Repairing (E&EAR) ba la pynïaid da ka Gracy & Co. Institute of Information Technology (GCIIT) Society ba ki dei ban shimkhia bad trei shitom khnang ba ka jingthmu jong ka sorkar India kan long kaba jop bad ai jingkyrmen na ka bynta ka lawei jong khun samla.
Kiba la ïa donlang ki long u Bah V.W. Nongsiej, Managing Director bad uba dei u trai jong ka Gracy & Co. Institute of Information Technology ne ka GCIIT Society, Mawkyrwat lem bad ki nongtrei hapoh ka GCIIT Society, Mawkyrwat ryngkat ki nongshah hikai pyntbit.