Watla ki don ïa i madan iba rit, hynrei lada ki pyndonkam hok kin sa mih ki khlur ïalehkai kiba tbit: HNYF
![](https://mawphor.com/wp-content/uploads/2022/05/Sports-2-750x430.jpg)
Mawkyrwat, ‘Naiwieng 29: Ka Hynñiewtrep National Youth’s Front (HNYF) jong ka Mawpud Area Unit mynta ka sngi ka la ïoh ban plie pyrda ïa ka lympung ïalehkai kynjatbol ba la tip kum ka 3rd Invitation Football Tourna-ment 2022 ha madan shnong Lower Mawpud ha kaba u bah Shining Wanniang, Vice President ka HNYF, South West Khasi Hills District u la long kum u kongsan.
Ki kynhun kiba la ïoh ban ïalehkai sdang ban plie pyrda ïa kane ka lympung ki long ka Top Guy Football Team bad ka Pyrshang De Football Team ha ka por 12:30 shiteng sngi ha kaba ka Top Guy FT ka la jop da 8 – 2 kol. Ïa ki kol na ka bynta ka Top Guy FT la thep da u Helison Kharlartang ha ka minit kaba 19 bad 80, na u Marton Kharlartang ha ka minit kaba 39, 42, 67, 76 bad 83 bad ïa kawei pat ka kol la thep da u Nah Wanniang ha ka minit kaba 84.
Ha ka jingïalehkai kaba dei ha ka por 2:30 noh phai sngi pat ka Partner (Songdongktieh) Football Team ka la jop da 6 – 1 kol pyrshah ïa ka Dombah Football Team, ha kaba ïa ki kol jong ka Partner (Syndongktieh) FT la ïoh ban thep da u C. Mawleiñ ha ka minit kaba 14 bad 51, da u Donald Khardewsaw ha ka minit kaba 22, u B. Snaitang ha ka minit kaba 33, u Zero Khardewsaw ha ka minit kaba 48 bad na u B.L. Snaitang ha ka minit kaba 72.
Lah ban kdew ba ki kynhun kiba la wan ïashimbynta ha kane ka lympung ïalehkai kynjatbol jong ka 3rd Invitation Football Tournament 2022 ba la pynïaid da ka Hynñiewtrep National Youth’s Front (HNYF) jong ka Mawpud Area Unit ki don baroh 32 tylli.
U bah Shaining Wanniang, Vice President ka HNYF, South West Khasi Hills District haba kren ha ka jingïalang ba lyngkot u ai mynsiem da kaba ong, watla ki samla jong kane ka shnong ki don ïa ka madan kaba rit ban ïalehkai, hynrei wat nym duh jingkyrmen pynban kin long borabor kiba trei shitom bad pyndonkam hok ïa ka sap ba ki don khnang ba kin kiew na kawei ka por sha kawei pat. “Ym ba ka jingïalehkai jong ki kan kut noh tang hapoh shnong, hynrei ki dei ba kin kiew sha ka distrik, ka jylla bad ka ri ruh kumjuh”, ong u bah Shaining.
U la ban ruh ba watla ki don ïa i madan iba rit hynrei kum ka seng kam ju shongkli kti ne shongthait pynban ka ju ïai pynlong ïa kum kine ki lympung kiba long kawei na ki bynta ban ai mynsiem ïa ki samla ba kin ïoh ban pyndonkam hok ïa ka sap ka phong ba ki ki don ha ki jingïalehkai ryngkat ka thong ha ka jingim jong ki namar kum ki ‘rangïalehkai haba ki buh ïa ka thong shakhmat ryngkat ka jingrai kut, ban long ruh uba ïai-shah kata ka jingthmu jong ki kan sa urlong. Namarkata, kum ki samla ïalehkai ki dei ban shim ruh ïa ka kabu ban long ki atiar, ki nongrah-ktien syiem na kane ka shnong da kaba kyrmen ba ha kawei ka sngi kin sa paw ba napoh shnong Mawpud ki la don kita ki khlur ïalehkai kiba tbit.
Ha ka jingkren jong u, u la kyntu na ka bynta ki samla ïalehkai ba lada ki kwah ban kiew ha ka kam ïalehkai ki dei ban kiar rai maw rai dieng na ki jingdih kiba pynbuaid kum u duma, u kwai, ka kyiad bad kiwei de namar lada ki la mlien ïa kine ka met jong ki ruh kan troiñ noh tang shiteng por. Haba kren ai mynsiem na ka bynta ki ‘rangïalehkai jong ki ar tylli ki kynhun kiba mihkhmat mynta ka sngi u la ong ba ha ka jingïaleh kan sa don beit kawei kaba jop ba kawei kaba rem, kaba jop kam dei ban don noh ka mynsiem jingsngew-sarong haba la jop hynrei kan nang trei shitom shuh shuh ban nangkiew shaphrang bad kaba rem ruh kam dei ban duh mynsiem hynrei kan nang trei shitom ban ïoh kheit ïa u soh jong ka jingjop ha kawei pat ka por.
Kiba ïadonlang ha kane ka sngi ki long naduh ki Myntri jong ki ar tylli ki shnong Upper Mawpud, u bah Macdonald Thongni bad jong ka Lower Mawpud, u bah Robert Basan, ki paidbah jong ka shnong naduh ki longkmie longkpa, ki samla synrang bad kynthei ryngkat ruh ki hep kiba rit, bad ki dkhot jong ka NHYF ba kynthup ïa u Working President ka HNYF, South West Khasi Hills District, bah Shimbor Langte bad kiwei de.