Watla khlem dep ka kam, paw ka projek JJM ha ka thup ba la pyndep pura ka jingtrei, kynnoh ka GHYS

By Mawphor Editor On Feb 16, 2026

Shillong, Rymphang 15: Ka la mih sa kawei pat ka jingujor ha kaba ïadei bad ka rukom pyntreikam ïa ka Jal Jeevan Mission (JJM) ha Garo Hills.
Ka seng kaba la khot da ka Garo Hills Youth Solidarity (GHYS) ka la phah ka jingkyrpad bad state Lokayukta kaba kynnoh ïa ka jingdon ka kam bamsap bad ka jingbym ïaid beit ka projek JJM ha Agrenggittim ha South Garo Hills bad ka seng ka kynnoh ruh ba ïa kane ka projek watla khlem pat pyndep hynrei ka la dep don pat ha ka thup kyrteng ba la dep ban pyndep ïa ka kam bad ba ka pisa ruh kaba la mang la dep ban siew.
Ïa ka JJM la thmu ban pynbiang ki pipe um kiba pynpoi ka umdih sha baroh ki longïing ha ki thaiñ nongkyndong ha ka ri hynrei ki pipe kiba la thmu ban pynpoi sha Agrenggittim la pynïaid kynriah noh shawei, kaba la pynlong ïa kane ka shnong ba kan tyrkhong khlem umbam kaba biang.
Ka GHYS ka la kyrpad ba dei ban tohkit halor kine ki jingshah kynnoh ki kam bamsap, ka jingpynïaid ïa ki official record bad ba la pynkylla na ka jingpynwandur kaba la mynjur na ka bynta ka Era Rongsa Combined Water Supply Scheme.
Ka seng ka la ïathuh ba ka sorkar pdeng ka la mang T. 5.71 klur na ka bynta ban pyntreikam ïa ka combined water supply project kaba kdup ïa ki 4 tylli ki shnong, ka Rongsa Awe, Era Aning, Mengkulgittim bad Agrenggittim. Ïa ka kam kane ka project la ai sha ka Infratech Pvt Ltd.
Katkum ka detailed project report (DPR) ba la mynjur, ka treatment plant kaba don 3 tylli ki tank – ka pre-sedimentation tank, filtration tank bad ka clear water reservoir – la shna ha Rongsa Awe. Ka technical design ba la mynjur ka la batai shai ba ïa ka um yn sam beit sha Agrenggittim lyngba ki 65mm GI pipe bad la ka jong sha Era A?ning lyngba ki 80mm GI pipe.
Hynrei ka la don ka jingkynnoh ba u contractor, da ka jingïapynbeit bad ki nongtrei sorkar, ki la pynkynriah noh na kane ka design ba la mynjur.
Ka seng ka ong ba ka shnong Agrenggittim ka don ha ka jaka kaba tyrkhong um ha ka por bym don slap, ha kaba kane ka la pynbor ïa ki nongshong shnong ban hap ïaid jngai ban leit tong umdih na ka pung ba jngai.
Watla kane ka project ka khlem treikam, la kynnoh ba kane ka projek ka ladon ha ka thup ba la pynbna ba la pyndep ïa ka kam bad ka pisa ba la dep mang la dep ruh ban siew.