Watla kane ka jingjia kadei kaba shajngai, rai i mei ieid ban die ïa la ki jong ki mar ha Ïewduh

Shillong, Ïaïong 28: Ka jingphah khang ïa ki dukan hapoh nongbah Shillong da ka Barabazar Merchants and Shopkeepers Association bad ka Shillong Citizens Forum ka la ktah bha ïa ka kamai kajih jong kito kiba shong dukan barit bad kiba shu die ha madan naba bun na kine kiba shong die madan ki la dep ban shim lypa ïa ki mar khamtam ki mar kiba pyut bad kiba sniew kloi.
Haba ïoh ban ïakren bad iwei na ki mei Ieid iba die tympew ha Basa dielang ïa u Tympew ha ïew Mawlong, stand Mawngap, i la ong ba kane ka jingkhot phah khang ïa ki dukan ka la ktah bha namar lada ka ïew ka khang kan shem shitom ïa i bad ia kiwei pat ban kamai ban ïoh thied khaw.
Ine ki mei ieid iba dei ruh na ka shnong Laimaw kaba don sha ka thaiñ Smit i la ong ba kane ka jingphah khang ïa ki dukan ka ktah bha khamtam ma i, ila ïathuh ba im tip ïa kaei kaei ruh bad ba i khlem ïohlad hi ruh ban pule ïa ki kot khubor hynrei la shu ong tang ban khang ïew, bad na ka liang ine ki mei ieid i la wan la ka wan, naba kane ka jingjia ka dei kaba jia shajngai bad kumta i la rai ban wan bylla beit tang ban ïoh khaw shi kilo ar kilo.
Na ka liang jong i, ila pynpaw ruh ban khang kat ïa ka Ïewduh kaba dei ka ïew kaba heh duh hangne ha jylla ka ktah shibun, namar hapoh Ïewduh hi bun kiba wan thied wan pet dei hi kiba na thaiñ nongkyndong bad kumta kane ka long ka jingduh kaba khraw.
Wat hapdeng ka jingpynbna ban khang ïa ka Ïewduh bad kiwei ki jaka ïew, hynrei na ka liang kiba la wan hi ban die ïa la ki jong ki mar ki mata ki la wanpoi naduh ka por 9 haduh 10 baje mynstep ha Ïewduh. “Nga te nga la wan naduh ka por 9 ne 10 baje mynstep shane sha Ïewduh,” ïathuh itei u mei ieid.
Lah ban ong ba ka Basa Dohkha, ka Basa Doh, ka Basa Tympew bad Basa kwai ki la dei ki Basa ha kaba ki nongdie ki la wan beit sha Ïewduh ban bteng beit ïa la ki jong ki kam khaiï kumba ju leh manla ka sngi namar ki sngew ba kane ka jingpakhang dukan kan ktah ïa ka kamai kajih jong ki.