Watla ka jingtei ym pat pyndep pura, la phah plie ïa ka CADL ha ka myntri sorkar pdeng, ong ki sengbhalang

Shillong, Naitung 14: Ki nongshong shnong ka Nengkra A·we ha East Garo Hills ki la pynpaw ka jingpyrshah ha ryngkat bad ki sengbhalang bapher bapher pyrshah ïa ka rai jong ka sorkar ban plie ïa ka Children Adolescents and Digital Library (CADL) kaba la tei ha Nengkra wat hapdeng ki jingsngewkhia kiba bun halor ki jinglong jong ka bad ki rukom pyntreikam ïa ka.
Ha ka jingleit jurip lang jong kiba bun ki sengbhalang ki la pynkut da kaba ong ba ka ïing jong kane ka library ka la mad ïa kiba bun ki jingduna ha ka rukom batei bad kiwei ki jinglong jingman. Kane ka library ka la long kawei na ki 72 tylli kiba la plie da ka Myntri ka sorkar pdeng ba khmih ïa ka tnat Pla Tyngka ka Nirmala Sitharaman ha ka jingwan jngoh jong ka ïa ka jylla Meghalaya.
“Na ka jing plaster kaba khlem long katkum ba dei ban long bad mynta pat ka la lam sha ka jingorpait jong ka main building, bad na ki jingshna ïa ki paiñkhana ba pohdor bad ka jingbym ler kam ki lad pynlang um slap khlem da kheiñ ïa ka jingmang pisa bad ki jingrep ka dor ban shna, bad kane ka pynphalang ïa ka jinglah ban pyndonkam bakla ïa ka pisa paidbah kaba thmu ban kyntiew ïa ki khynnah bad ki samla ha kane ka thaiñ,” ong kiba pyrshah ha ka kyrwoh khubor.
Ïa kane ka kam la leit ruh ban pynpaw hakhmat Block Development Officer ha ka 30 tarik u bnai Jylliew hynrei kam shym la don ka jingpynbeit kaba la shim kam, ong ki sengbhalang, bad ïa kane ka kam ki la rah ruh ban ïakren ba Deputy Commissioner, hynrei kane ruh ka khlem longkam.
“Kaei kaba ktah bha ka long ba ha ka jaka ban pynbeit ïa kine ki jingsngewkhia ne ban sdang ka jingtohkit, na ka liang ki bor pynïaid ki la ïaidshakhmat ban pynkhreh ïa ka jingplie paidbah ïa kane ka Library kaba ym pat pyndep bad ka jingtei kaba pohdor khlem da ïoh ka jingmynjur na ki nongshong shnong ne ki NGO. Kane ka jingleh la ïohi da ki paidbah ba ka dei ka dak ka jingshet kylla ïa ka sur jong ka kynhun,” bynrap ka kyrwoh khubor. Haba phai sha ka jingwan jngoh ka Myntri ka sorkar pdeng, kane ka pyni ïa ka jingkwah ban pynpaw ïa ki kam kiba ym pat pyndep kum ka kam kaba la dep pyni hakhmat jong ki heh ki haiñ ka sorkar pdeng ym tang ba ka la buhrieh ïa ka jingshisha hynrei ka la pynlehraiñ ïa ka jingsngew jong ki paidbah kane ka thaiñ.”