Watla iehbeiñ bad peit shilliang khmat ka sorkar, durut ki nongrep ka WKH

Nongstoiñ, Rymphang 5: Kumba 80% na ki paitbah nongshong shnong ka West Khasi Hills, ki dei kiba im da ka rep ka riang bad ki mar rep bad ki jingthung jingtep ki ïapher na kawei ka jaka sha kawei pat ka jaka katkum ka jinglong ka suiñ bneng bad ka jingdon jong ki jaka rep.
Haba phai sha ka rep ka riang hapoh ka District ki don lai jait ki jait mar rep kiba ki paitbah nongshong shnong ki kham ïabeh kat kum ka jinglong ka jaka. Ha ki bynta kiba don ha shilynter u pud Assam, ki mar rep ba kongsan ki dei u kwai, tympew, ki soh bad u synsar kiba la ju thung tang shisien bad kiba neh pat da ki phew bad spah snem, nalor kiwei ki mar rep kum kba, u sying, shynrai sohmynken bad kiwei kiwei kiba ki ju thung katkum ki aïom kiba la ju tip kum ki seasonal crops.
Ha kiwei pat ki bynta ba ha pdeng jong ka district ki mar rep ba kongsan ki dei u phan, riewhadem, biskot, ki jhur ki jhep bad u kba kiba dei ki seasonal crop. Ha ki bynta pdeng jong ka West Khasi Hills District, namar ka dei ka jaka kaba baroh ki jingthung jingtep ki dei kiba mih katkum ki aïom, hynrei ki jaka rep kim ju sah thylli ha baroh kawei ka snem.
Napdeng ki jaka rep kiba paw bha ha ki bynta pdeng jong ka West Khasi Hills, ka dei ka pyntha Umyiap kaba dei ruh ka pyntha rep kaba heh tam hapoh ka jylla. Katei ka jaka rep ka dei ruh ka pliang ja jong ki phew tylli ki shnong kiba hap ha ka Nongstoiñ C&RD Block bad katei ka pyntha rep kam ju sah thylli ha baroh shi snem lynter.
Ha kine ki sngi wat la ka dei ka aïom kaba ryngkhiang ha kaba ki phlang ki kynbat ki la ïap lut, hynrei katei ka pyntha rep ka jyrngam hi khrek da jingthung jingtep kum u motor, dhonia, kajor, phan bad ki jingthung ba laiphew jait.
Lada peit sha ki bynta ba shaphang mihngi na ka shong Nongrangoi, ka pyntha ka jyrngam khrek da ki jingthung bad satang kumba ar bnai, ka jingjyrngam kan sa jah shibit por bad tang shu mih u bnai Jymmang ter ter haduh u bnai Nailar, naduh sdang haduh ba kut jong katei ka pyntha kaba jrong da ki bun kilomitar ka jingjyrngam ka neh.
Ka jingjyrngam sah jong katei ka pyntha ka pyni shai ba ki paitbah nongshong shnong ka thaiñ Umyiap, ki dei kiba dang ñiewkor bha ïa ka rep ka riang bad ki dei ruh ki briew kiba trei shitom ki bym ju pynsep ei ïa ka por ka jong ki.
Ki nongrep ha katei ka pyntha ki ju kamai da ki phew hajar bad wat da ki lak ruh tang na kaba rep jhur. Ka la long shisha ka jingmyntoi kaba khraw ïa ki longïing longsem jong ki nongshong shnong jong ka thaiñ Umyiap baroh kawei.
Bun ruh na ki samla kiba hapdeng kane ka juk kyrduh kam kyrduh jam bad la eh ban ïoh bylla, ki la sdang ban phai sha ka rep ka riang bad ri jingri kum ka lad ban kamai.