Shillong, Naiwieng 04 : Ka tnad Trade jong ka KHADC ka la kynduh mawsiang ban khynra ïa ki kot ki sla jong ki kali kiba kamai ha sor bad khap sor watla ki la ïoh pdiang ïa ka jingujor na ka Synjuk ki nongniah taksi sor bad khapsor haba ïadei bad ka Trading License.
“Mar ïa ïoh pdiang ïa ka jingujor ngi la phah ïa ki enforcement ban leit khynra ha ki katto katne tylli ki dong bapher bapher ha sor. Hynrei ngi ïoh pat ïa ka report ba ka long kaba eh ïa ki ban talasi ïa ki kot ki sla jong ki kali namar tang shu pan ia ki kot ki sla ka la wit ïa ka ïaid ka ieng jong ki kali bad kumta ka mih ka jinghylla ka jingkyrkait ba mih ka dheng kali. Kumta ki enforcement ki la hap ban sangeh noh bad pyllait ïa ki kali kiba la dep bat,” ong u Executive Member ka tnad Trade, Bah Gigur Myrthong haba kren bad ki lad pathai khubor.
Haba jubab halor ka jingkylli, u Bah Gigur u la ïathuh ruh ba katkum ka kaiphod ba la ai da ki ophisar la kdew ruh ba la lap ba don bun ki nongniah kali kiba dei ki bar jylla katba ka kali kadei jong ki Khasi bad kumta na ka liang ka Council ka eh ban lei lei khamtam haba ki kot ki sla ki dei jong ki Khasi.
“Kumta kum kine ka buh jingeh ïangi ka Council ruh ban pynshisha,” bynrap biang u Executive Member.
U Bah Gigur u ïai ban ruh ba na ka bynta ki bar jylla ki donkam shwa ban ïoh ïa ka trading license ha shwa ba kin ïoh ïa ka permit bad kumta halor kane, na ka liang ka Council na ka por sha ka por ka ju thoh sha ka Transport Department ba donkam ban da ïoh shwa ïa ka Trading License na Council shwa ban ai permit.
U Executive Member u ong ruh ba ha ka jingshisha na ka liang ki District Transport Officer ruh ki dei ban shimkhia lang halor kane ka bynta.
Na ka liang u Bah Gigur u kyntu ruh ïa ki Khasi kiba dei ki trai kali ba ha ka por ba ki die ïa ki kali ki dei ban da aiti noh ruh ïa ki kot ki sla bad ba kim dei satia ban shah pyndonkam sah ïa ka kyrteng jong ki. U ong ruh ba don ki khep ba ki don ki briew kiba wat hadien ba ki la dep die ïa ki kali ruh hynrei ki dang pynneh sah ïa ka kyrteng jong ki ha ki kot kali.
“Kumta lada ka long kumne, ka long kaba eh bha lada ki paidbah hi kim ai ka jingïatrei lang. Shisien ba phi la die ïa ki kali dei ban aiti lut noh ïa ki kot ki sla ba dei jong ki kali,” u la bynrap biang.
U Bah Gigur u la pyntip ruh ba ka tnad ka la dep ban shong jingïalang bad ka Enforcement bad shen kan sa don biang ka jingkhynra ïa ki kali tangba ha kane ka kynti kin leit lang bad ki pulit namar lada leit hi tang na ka Council kan mih bun bha ka jingthnum na ki paidbah.
Shwa kane, u Bah Gigur u la ong ruh ba na ka liang ka tnad ka eh bha ba ai jingkheiñ katno ngut ki draibar bar jylla kiba don ha u pud u sam jong ka Council.
