Watba la dep ka Christmas bad kut u Kyllalyngkot ym pat siew ïa ki bill contractor, yn shimkhia u MP

Shillong, Rymphang 01: Ki Contractor hapoh ka shatri jong ka Khasi-Jaiñtia Government Contractor Association ki la kyrpad ïa u MP ka Shillong u Dr. Ricky AJ Syngkon halor ka jingbym pat lah siew ïa ki bill kiba ïadei bad ki kam ba la pyntrei ïa ki projek jong ka Jal Jeevan Mission (JJM) Scheme.
Haba khot ïa ka jingtuklar lem jong u ban pynbeit noh ïa kane ka jingeh, u President jong ka Association, u Bah Welcoming Langi u la pynpaw ka jingkyrmen ba u MP un sa rah lem ïa kane ka kam sha New Delhi.
U la ong ba na ka daw jong ka jingbym pyllait ïa ki bill kiba dangsah jong ka jingpyntrei ïa ki projek ka JJM, ki contractor haduh mynta kim pat lah ban siew ïa ki ram jong ki, kiba sah ha ki bank.
Katba u Vice President ka Khasi-Jaiñtia Government Suppliers’ Association u Bah FD Ramsiej u la kynnoh ba ka jingbym pyllait ïa ki bill jong ki na ka sorkar jylla mynta ka la long da ki snem. “Bun na ngi, ngi la shim ki ram na ki bank ban pyndep ïa ki kam ba la aiti sha ki,” u la ong.
U Bah Ramsiej u la ong ba u MP ka Shillong u la pynthikna ba un sa rah ïa kane ka kam bad ka sorkar pdeng ban tip ïa ki jingshisha halor kane ka phang.
Katkum ka jingong jong u, ula ong ba ki bill kiba dangsah jong ki contractor kim dei tang ka jingpyntreikam ïa ki skhim JJM hynrei kumjuh ruh na ka bynta ka Water Resources bad kiwei pat ki tnat.
U Bah Ramsiej u la ong ba ki jingpynthikna da ka sorkar ba ïa ki bill yn siew noh ha shwa ka Christmas, bad hadien pat ka ong ha u bnai Kyllalyngkot, haduh mynta kane kam pat urlong satia.