Wat ym ai ïa ka jingdawa jong ka HPC, dawa ka HYC na u Dy. CM

Shillong, Jymmang 09 : Ka Hynñiewtrep Youth Council ha ka sngi Nyngkong ka la kyntu ïa ka sorkar jylla ba da lei lei ruh kam dei ban mynjur ïa ka jingdawa jong ka Harijan Panchayat Committee kaba dawa bad buh kyndon bha lada ka kwah ba kin kynriah noh na them-metor.
Haba kren bad ki lad pathai khubor hadien ka jingkynduh ïa u Symbud Myntri Rangbah ka Jylla, u Bah Prestone Tynsong, na ka linag u president ka HYC Seng Kmie, Bah Robertjune Kharjahrin u la ong, “Ka jingkylli ka long mano ba longtrai ïa ka jaka hangto. Baroh ngi tip ba ha kine ki khyndiat snem ka sorkar ka la dep ban soi ïa ka soskular bad ka Hima Mylliem kaba mut ba ka sorkar ka la shim noh ïa kato ka jaka na ka Hima Mylliem.”
Shuh shuh u ong ruh ba lada ym bakla ka sorkar ka la dep siew ruh da ka pisa nalor ka jingïateh ba ka Hima Mylliem kan ïoh lang ïa ka bhah na ki jingmih na kitei ki jaka ba ka sorkar kan sa tei hangtei.
“Ka shai mynta ba ka sorkar ka long trai ïa katei ka jaka hangtei. Kumta haba ka sorkar ka long trai ïa ka jaka kumno pat kitei ki briew kin ak kum ki trai jaka bad dawa ruh ban bujli ïa ka jaka,” la buh jingkylli u Bah Robertjune.
Nalorkata, u ong ba kum ka seng ki pynpaw ba kim sngewïahap satia ïa katei ka jingdawa jong kitei ki briew kiba sah ha Them-metor.
U ong ruh ba lada ka sorkar ka mynjur ïa ka jingdawa jong ki kan buh jingeh haduh katta katta khamtam lada baroh ki nongtrei sorkar ki bym don jaka kumjuh ki nongrep ki bym don jaka ki mih paidbah ban dawa jaka lang na ka sorkar.
Shuh shuh u ong ruh ba ka Seng ka la buh ruh da ka jingthoh ban pynpaw ïa ka jingpyrshah ïa katei ka jingdawa jong ki. “Na ka liang u Symbud Myntri Rangbah u la pynshai ba bun kitei ki jingdawa ba ki buh ka sorkar ka la dep ban kyntait.
La ïathuh ba la pyntip ba ka sorkar ka la dep pynkhreh ïa ka blueprint ban ai tang ka quarter ïa ki hynrei na ka seng pat ka iai ban ba ka quarter ruh dei ban ai tang ïa kito kiba treikam sorkar bad ha kiwei kiwei ki public undertaking.