Nongpoh, Risaw, 19: U Syiem ka Raid Marngar u Paiem Richard Syiem u la pynbna da ka jingmaham ïa ki khun ki hajar ba kim bit ban wanrah ïa u kwai im bad sohphlang sha ki shnong ki thaw ba hap ha ka Raid Marngar ha Ri-Bhoi District katba ki nongrep kim pat dep ban lum ban lang bad ban ot ïa u kba kumba mynta ka la dei artad ka aiom ba ki nongrep ki la sdang ban ot bad ban lum ban lang ïa u kba.
Na ka liang u Paiem Richard Syiem u la ong ruh ba kane ka dei ka jingmana naduh hyndai hynthai bad ka dei ka jingngeit tynrai ba ym bit ban wanrah ïa u kwai im bad sohphlang katba ym pat dep ot ne lum lang ïa u kba namar lada ïaleh pyrshah ïa kane ka jingmaham ne mana jong ka Raid ka lah ban wan ka nem sniew kum ka eriong bad u phria kiba lah ban lynshop ïa ki mar rep khamtam ïa u kba, u ba ki nongrep ki la ap khmih lynti dik dik ban hiar noh sha ki pynthor ot bad ban lum ban lang noh.
U la ong ruh ba kum ka Raid hi baroh kawei ki ju ñiew kyntang bad ñiew burom ïa u kba u khaw ban bit ban biang ka khaii ka pateng bad ban ïada na ka jingwan lyngshop bad dei na kata ka daw hapoh ka raid Marngar haduh mynta ym pat shah ban rah ïa u kwai im bad u sohphlang haki iew ki hat bad ki shnong ki thaw katba ym pat dep ban ot ïa u kba.
Namarkata kum ka riti dustur bad ka jingngeit ba la buh naduh ki longshuwa manshuwa ka Raid Marngar ka la mana ïa ki paidbah ba kim bit da lei lei ruh ban wanrah ïa u sohphlang bad u kwai im katba ym pat dep ka aiom ot kba tad haduh ba ki nongrep ki la dep lut ban ot ïa u kba bad ban lum ban lang na ki pynthor kba jong ki bad lada lap ïa kiba leh pyrshah, na ka liang ka raid kan sa shim da ki sienjam ba tyngeh katkum ki kyndon jong ka Raid.
