Shillong, Rymphang 02 : Ka District Magistrate jong ka East Khasi Hills ka la pynjari da ka Section 163 BNSS, 2023 ban maham tyngeh ïa ka jingpynpoi, ka jingbuh lane die ïa ki dohkha ba wanrah beain na Bangladesh khlem ki kot ki sla kiba biang da ki kali, ki lieng lane kino kino ki rukom la ka long da ki briew kiba donkti ha katei ka kam beain hapoh u pud u sam jong ka East Khasi Hills district.
Ha ka kyrwoh, la kdew ruh ba kane ka hukum ka dei hadien ba la ïoh pdiang ïa ki khubor ba ka don ka jingpynpoi beain ïa ki dohkha na Bangladesh lyngba ki khappud bapher bapher, ki lynti um, ki surok bad ki jaka iew kiba don ha ka jylla, kumta kane ka sienjam ka long ban khanglad ïa kine ki dohkha ban ïoh rung sha ka distrik lyngba kino kino ki lad.
Shuh shuh la ong ruh ba kane ka jingpynpoi beain bad ka jingpynrung ïa ki dohkha da ka lynti bym dei ka long kumba pynkhein ïa ka kyndon treikam jong ka Customs, Import – Export bad kiwei ki kyndon jong ka Food Safety kynthup ïa ka jingma ïoh poi ki dohkha ba don jingpang ne kiba la khang ban die.
Kane ka hukum ka kdew ruh ba ka jingdie pathar ïa ki dohkha na kiwei ki ri khlem da bishar bniah ïa ka jinglong jingman jong ki, ka buh ka jingma kaba khraw ïa ka koit ka khiah bad ka khuid ka suba bad ka don jingma ruh wat ban ktah ïa ka ïoh ka kot jong ki nongkhaii dohkha kiba imja na kaba die dohkha kumjuh ruh ïa ka sorkar jylla.
Kumta la maham ba kino kino ki briew kiba pynkhein ïa kane ka kyndon kin ngat ha ka Section 223 jong ka BNS, 2023 bad kiwei ki kyndon jong ka ain kynthup ïa ka Customs Act, Foreigners Act, Passport Act bad kiwei kiwei.
Shuh shuh la pyntip ruh ba kane ka hukum kan treikam noh mardor bad tad haduh ban da pynbna da kumwei pat.
