Wat wanrah ïa ka jingsngew ïapher jaidbynriew ong u Dy CM ïa kiba dawa bujli CM da ki Khasi

Shillong, Nailur 24 : U Symbud Myntri Rangbah bad President ka National People’s Party (NPP) Meghalaya, u Bah Prestone Tynsong ula ong kam don jingmut ban dawa thung Myntri Rangbah da u Khasi namar kane ka thew sha ka jingwanrah ïa ka jingsngew ïapher jaidbyntiew. Kaba kongsan ka long kam pher lada dei mano mano ruh tangba ngi dei na kajuh ka jylla ym dei ba ngi wanrah Myntri Rangbah na West, Bengal, Bangladesh ne Assam . Kaba kongsan ka long ban wanrah ïa ka roi ka par bad ka bha ka miat ka Jylla ym ban jied Jaidbynriew.
“Ngam donkam ban kynthoh ïa kane namar balei ba ngan wanrah ïa ka jingsngew ïapher Jaidbynriew. Nga sngew ba ngim dei ban ïakren ïa kane, ym dei hi ruh” ong u Bah Prestone haba ïakren bad ki lad pathai khubor haba jubab ïa ka jingkylli halor ka jingdawa jong kawei ka kynhun Sengbhalang.
U Bah Prestone ula ban jur ba kaei kaba kham kongsan ka long ban pynthikna ïa ka roi ka par jong ka Jylla bad ka bha ka miat ka dei ban don ha ka lynti kaba dei.
“Katba ngi dang ïa don ha Meghalaya, MLA ka Meghalaya, ngam don jingsngew mano ba dei u Myntri Rangbah” ula ong haba phah ïa ka khubor kaba shai ba um kwah satia ban shimti ïa ka shuki Myntri Rangbah.
“Ai ba ki briew jong ngi kin sngewthuh ïa kane. Lada phi ong hooid phi wanrah ïa u Myntri Rangbah lehse uba na West Bengal ne na Bangladesh ne Assam, hooid nga ruh nga pyrshah ïa kane” ula ong.