Shillong, Jylliew 22 : Wat wan ïaleh politik ko ki Myntri bad nongïalam ka BJP haba kat kat kane ka saw ka sian ka jylla ka ïa kynduh na ka jingshah lyngshop ha ki bor mariang. Wat mut tang ba phi don ha ka bor ha Delhi phin shu ïoh ban wan kren lap lah katba mon ha kane ka jylla Meghalaya. Nalor kata phi kynmaw ban wan sha ka jylla tang ynda la jan election hynrei hadien kata sawsnem shiteng lynter phim ju kynmaw. Ha ka jaka ba phin pynbna jingïarap pisa ïa ka jylla ba kan ïoh ban maramot kloi ïaki jingshah pynjulor hynrei phi kynnoh pynban ba ym shym la pyntreikam hok ïaki skhim, phi mut aiu ban ong kumne, ong u MLA ka Mawlai Constituency u bah Process T Sawkmie.
U la kynthoh jur kumne ban pyrshah ïa u Myntri Khynnah ka sorkar pdeng u John Barla uba la kynnoh ba ka sorkar jylla ka khlem pyntreikam hok ïaki skhim ka sorkar pdeng. Ym don kawei ruh ka skhim ba ka sorkar jylla ka khlem pyntreikam hynrei ka daw ka dei ka jingpynslem hi ban pyllait pisa na Delhi ba sa slem ban pyndep ïa ki skhim.
U bah Sawkmie u la ong “ Ha ka jingshisha une u Myntri Khynnah u la dei ban ai ka jingïaroh ïaka sorkar jylla ba kat kane ka saw ka sian ba ïa ka kynduh na ka jingther u lapbah bad jingshlei um ha kaba bun ki mynsiem briew ki la duh ei ïa ki jingim, ki surok, ki jaka rep jaka riang, ki jaka pule bad ter ter kila julor jur khnang ba ka sorkar kan lah ban ai jingïarap ïa ki paidbah. U la dei ban pynbna ïa ka song jingïarap na ka sorkar pdeng kumba la pan ruh da u Myntri Rangbah 300 klur tyngka hynrei u wan ban kynnoh pynban ïa ka sorkar jylla”.
Kumta u bah Sawkmie u la ong ba kane kam dei ka por ban ïaleh politik, kaei kaba kongsan ka long ba ka sorkar pdeng kan pyllait pisa kloi ïaka sorkar jylla ba kan ïoh maramot ïaki surok kiba la jot la pra khamtam sha South Garo Hills ba la hap ban leit pynhiar mar bam da ki helikopter bym lait ïaid shuh na surok. Kumta u la ong “ Wat shim kabu tang ban kynnoh shim kabu ruh ban ïarap kloi ïa ka sorkar jylla da ka pisa ba kan ïoh ban tei pat ïa kiba la jot la pra” pynkut u bah Sawkmie.
