Wat wan byrngem ïa ngi haba phim nud ban byrngem ïa ka Sorkar la jong

Shillong, Jymmang 03: Ka jingbyrngem jong uwei na ki lai ngut ki MLA ba ïashim bynta ha ka jingïalang jong ka Joint Action Committee ha ka lah sngi U Blei ha Kynton u Mon, ka la pyndiaw bad pynbitar ruh ïa kiba bun ki ophisar jong ka tnad Forest and Environment jong ka sorkar jylla.
Lah ban kdew hangne ba ha katei ka jingïalang, u Bah Lambor Malngiang, uba long u MLA ka Nongkrem, ha ka jingkren jong u, u la byrngem ba lada don ki ophisar kiba wan khang ïa ki jaka tih maw tih shyiap ne shoh maw, kidei ban wanrah ryngkat bad ka Ambulance, namar lada ki wan khang, un tied da u tyrnem na ki kti jong ki.
Ha kane ka jingïalang ha kaba la don lang ruh u Bah Banteidor Lyngdoh, MLA Mawkynrew, u Bah Pynïaid Sing Syiem, MLA Mawryngkneng, baroh lai ngut ki MLA ba shong ha ka liang synshar MDA, u MLA Nongkrem u la bthah ruh ïa ki paidbah ban tih maw bad toh shyiap beit bad lada don ba wan khang kin pyntip sha u.
Katto katne ki ophisar kiba la phone sha u Mawphor, ki la ong ba ka jingbyrngem jong u MLa Nongkrem kadei ka bym lah pdiang satia, namar ym dei ma ki ba thaw ïa ka aiñ ne pynmih ïa ka hukum, hynrei dei ki bor sorkar bad ma ki leh ki shu leh beit ïa kaei kaba la bthah.
“Balei kim leit byrngem ïa ka sorkar la jong, haba ki don ha ka sorkar, balei ban byrngem ïa ngi”, la ong uwei u ophisar bym treh pynpaw kyrteng.
Kine ki ophisar ki la ïathuh ba kane ka jingkhang kadei namar ba bun ki shu tih beaiñ, khlem da ïoh jingbit na ki bor ba dei ban ai jingbit kum ki Mining Lease bad ki NOC, katkum ka Meghalaya Minor Minerals Concession Rules, 2016 bad kadei ruh ka jingpynkheiñ ïa ka hukum jong ka NGT ha ka snem 2013 bad katkum ka hukum jong ka High Court ha ka snem 2015.
“Hato kine ki MLA ki leh aiu baroh shi katta, kim tip ne pule ïa kine ki kyndon bad ki hukum ba ki khohreh mynta pat jait ba la jan dei ka elekshon ban pynbieit paidbah?”, la ong uwei u ophisar.
Shuh shuh ki la ong ba ha Assembly ruh la ju wanrah ïa ki amendment, hynrei kine ki MLA ym ju ïoh sngew ba kin kren eiei pat ba ki pyrshah. “Kim nud ïa kiba heh, ki wan byrngem pynban ïa ngi?”, la ong sa uwei u ophisar.
Da kaba kren bitar ïa kane ka jingbyrngem ba ki la ïohi lyngba ki kot khubor bad ki youtube channel, kine ki ophisar ki la ong ba kane ka jingbyrngem kadei ruh ka jingpynshit paidbah, ïa kaba ki bor ba halor jong ka sorkar kidei ban shimkhia.
“Wat lynlong langkñia ïa ngi, haba phim tip ban pule ïa ki aiñ bad ïa ki notification ne ki hukum ba mih na ka por sha ka por”, la kren bitar ki ophisar.