Wat u Myntri Rangbahduh ruh u la kubur ïa ka jingma na ka jingrung tuh ki nong Bangladesh : Chairman NESO

Shillong, Nailar 18: Ka North East Student Organizations (NESO) ha ka sngi Nyngkong ka la pynlong ïa ka jingshong kyllaiñ myngor ha baroh ki nongbah jong ki jylla kane ka thaiñ shatei lammihngi, kynthup ïa ka jylla Meghalaya, ban pynbor ïa ka sorkar pdeng bad ki sorkar jylla ban thaw ki aiñ ban ïada ïa ki trai ri trai muluk da kaba pynsangeh noh ïa ka jingwan rung kyrthep ki mynder ri napoh Bangladesh.
Haba kren bad ki lad pathai khubor ha ka sngi ba pynlong ka jingïakhih kaba jai jai ha nongbah Shillong, u Chairman jong ka NESO u Bah Samuel B Jyrwa u la ong ba ka jingkhot ban pynlong ïa kane ka jingshong kyllaiñ myngor ka long ban dawa na ka sorkar ba kan shim khia ïa kine ki jingeh ba ïadei bad ka jingwan rung kyrthep beaiñ ki mynder ri, kiba la long kum ka khlam kiba la sar ïa kane ka thaiñ mynta lah da ki phew snem.
“Ngi la mad ïa kane ka jingeh jong ka jingwan rungtuh beaiñ ki briew ba nabar ri na kylleng ki khappud khamtam na ri Bangladesh sha ki bynta bapher bapher jong ki jylla kane ka thaiñ shatei lammihngi. Ngi la ïohi ka jinglong jingman ha Tripura, Assam bad wat ha Meghalaya, ngi la sakhi ïa ki jingïakhih bad ki jingïakhih ki paidbah pyrshah ïa ka jingwan rungtuh ki mynder ri na Bangladesh. Kumta kane ka jingshong kyllaiñ myngor ka dei ka jingdawa ïa ka sorkar pdeng bad kumjuh ruh ïa baroh ki sorkar jylla kane ka thaiñ ba kin shim khia ïa kane ka jingeh kaba kongsan bad kaba ma bha khamtam ban pynsangeh ïa ka jingwan rung beaiñ ki mynder ri,” ong u Bah Jyrwa.
U Bah Jyrwa u la kdew ruh ïa ka jingkren jong u Myntri Rangbah duh ka ri u Narendra Modi ha ka 15 tarik mynta u bnai, uba la kubur ïa ka jingshah ktah na kane ka jingwan rung kyrthep ki mynder ri kaba la pynkylla dur ïa ki jaka bad ki shnong ha kane ka thaiñ.
“Naba u Myntri Rangbahduh u la kubur ïa kane kam kaba ma bha, ngi kyrmen ba ka sorkar pdeng kan skhim ki sienjam ba kongsan ha madan ban ïada ïa ka bha ka miat jong ki trai ri trai muluk kane ka thaiñ shatei lammihngi,” u la bynrap.
Haba kylli halor ka jingbym lah ka sorkar pdeng bad ka sorkar jylla ban shim ki sienjam ban pyntreikam ïa ka inner line permit (ILP) ha Meghalaya, u Bah Jyrwa u la ong, “Ka jingdawa ILP kadei kaba la slem bha ha kaba ka Khasi Students Union (KSU) ka la dawa naduh ka snem 1983 hynrei kaba sngewsih bad kaba sniewbok, ka sorkar pdeng bad kumjuh ruh ki sorkar pdeng kiba la leit kiba la bat ïa u la kam synshar kim pyntreikam ïa ka ILP ha ki jylla bapher bapher ha kine ki thaiñ bad kumjuh ruh ha ka jylla Meghalaya.”
U la ïathuh ba hadien ka jingshong kyllaiñ myngor ka NESO kan sa shong ka jingïalang ban ïakren ïa kiwei pat ki kam bad kin sa pyntip sha ki paidbah ïa ka rai ba ki shim.