Nongpoh, Jymmang 12: Hadien ka jingnang bteng jong u Bah Marcus Marten ban kam kum u nongïalam ka seng ki nongñiah auto ha ka thaiñ Nongpoh, ka kynhun kaba la dep ban register bad ka sorkar hapoh ka lama jong ka Nongpoh Region Auto Owners and Drivers Association (NRAO&DA) mynta ka sngi ki la leit ban buh syndon da ka jingthoh ha thanad Nongpoh bad kumjuh ruh sha ophis u District Transport Officer halor ka jingnang bteng jong u Bah Marcus Marten ban kam kum u nongïalam wat hadien ba ki nongñiah auto ki la dep ban pynthymmai ïa ki nongkitkam bad ioh bor ruh na ka sorkar lyngba ki kot ki sla.
Haba kren sha ki lad pathai khubor mynta ka janmiet hadien ka jingleit kynduh ïa ki pulit bad DTO na ka liang u Bah Banasar Lyngdoh Nonglait President ka NRAO&DA bad u Bah Elianby Tynsong kum u Education Secretary ki la ong ba ka pyrthei mynta kam dei shuh ka pyrthei biej hynrei ki briew ki la nang la stad bad ngim lah ban shu kam kulmar ïa ka nongkynti jong kiwei khlem ki kot ki sla ban pynshisha, bad kane ka long thik ïa u Bah Marcus Marten u ba kam ïalade kum u nongïalam bad pyndonkam bakla ïa ka kyrteng jong ka kynhun ki nongñiah auto bad ïalam bakla ruh ïa ki nongñiah auto namar wat hadien ka jingpynthymmai ïa ki nongkitkam u dang bteng ban leh ïa ki kam beaiñ ban khrong pisa na ki auto.
Halor ka jingkam jong u Bah Marcus Marten kum u nongïalam kaba la pynkulmar ïa kiba bun ki nongñiah auto, na ka liang u Bah Banasar Lyngdoh Nonglait u la ong “Kumno u Bah Marcus Marten u dang nud ban kam kum u nongïalam hadien ba kum ka kynhun ki nongñiah auto ki la dep ban register bad ioh ruh ïa ka jingithuh na ka ophis u Deputy Commissioner, hynrei u dang leit ban kam trai bad pan ka jingkyrshan nao phis u DTO bad kiwei kiwei, kaba long beaiñ, namar ngim dei tang ki nongñiah auto hynrei ngi dei ruh ki trai auto, ngi sngewkhia ïala ka jong ka kam, hynrei u ta u Bah Marcus Marten wat tang ka auto ha kti um don, bad um dei u nongñiah auto u leh kum u High Level, kumno kein um lehraiñ”.
U la ong ruh ba u Bah Marcus Marten kum u nongïalam barim u la bat kam haduh 14 snem, hynrei kum ka kynhun kam don satia ïa ki kot ki sla bad baroh ki la iap hadien ba kum ki nongñiah auto ki la pan jingshai lyngba ka RTI, hynrei ha u snem 2024 kum ka kynhun ki nongñiah auto ki la phah ruh da ka jingthoh ba un lum jingïalang hynrei u khlem pynsngap satia, hynrei da la mih ka kynhun kaba trei kam bad pynthymmai ïa ki kot ki sla u sa khoh reh.
Shuh shuh u Bah Banasar u la ïathuh ruh ba u Bah Marcus Marten wat hadien bun snem ba u la khrong pisa na ki nongñiah auto haba don kano kano ka jingeh ki para nongñiah ne ka pang ka shitom bad ki jingjia aksiden u la phah khrong thymmai biang, shano ka don ka pisa kaba la khrong la bun snem naduh sngi nyngkong haduh sngi saitjaiñ? buh jingkylli u Bah Banasar bad ha ka jingwad RTI jong ki wat ka passbook jong ka Association ruh kam don, hynrei lada don ki pyrshah ka, la shu beh lut bad ynda la lut ki nongñiah sa leit kam pat sa ki association kiba don sha kiwei ki jaka ban pynlang briew, hynrei ka jubab ka shai nangne shakhmat na ka liang kitei ki nongïalam ki la ong sngewbha shongthaid noh na ka kam bad lada u Bah Marcus Marten u dang bteng kim banse ban ïaid beit sha ka aiñ, u la bynrap.
