Wat tang ban sum ruh la ijli, ka um kum ka sha dud hap dih ki khynnah pule ka JNV Ñiangbari

Nongpoh, Naitung 26: Hadien bun bnai ka jingeh ba ïakynduh da ki khynnah pule jong ka JNV Ñiangbari na ka jingbym biang ka umbam umdih, ka bam ka dih, ki jingdonkam naduh ki paiñkhana, ki dawai kut tarik, ki khynnah pule jong ka JNV Ñiangbari ha Ri-Bhoi, da ka mynsiem ba sngewkhia kim lah shuh ban set hadien ba katto katne ngut ki khynnah ki la poi sha Hospital bad ioh ki jingshitom bala suba ba dei na ka um jakhlia kaba ki dih ha jaka sah jong ki ha katei ka skul bad kum ki khynnah skul mynta ka sngi ki la mih shakhmat ban pynpaw ïa ki jingeh jong ki ba ki ïakynduh ha katei ka shlem pule.
Katto katne ngut ki khynnah pule jong katei ka skul mynta ka sngi ki la ïathuh ba ki hap ban dih da ka umktieh kaba jakhlia namar ka jingbym banse ba ki bor pynïaid katei ka skul kim shym la peit bad khmih wat hadien ba ki khynnah na ka por shaka por ki la ujor sha ki bor pynïaid halor ka jingjakhlia bad ktieh ka um dih kaba ki hap ban dih nalor ba khlem shet bad bun na ki khynnah skul ki la ioh pang na ka jingdih ïa ka umjakhlia bad don ruh kiba la leit phai sha ïing.
Kumba la sakhi ruh da u nongthoh khubor mynta ka sngi la iohi ba ka um kaba ki khynnah ki hap ban dih ka long kaba isaitmet ban peit bad ijli wat tang ban sum namar ka jingktieh bad lati, bad nalor ka um jakhlia kaba ki khynnah ki hap ban dih ha katei ka skul pule, ki hap ruh ban ring mynsiem da ka lyer paiñkhana kaba ki bor pynïaid kim peit wat hadien ki jingujor ba bunsien da ki khynnah pule bad ka jubab kaba ki khynnah ki ioh na u Principal bad ki bor pynïaid ka long ba kim dei ban peit ïa ki jingeh hynrei ba ki dei ban pynleit jingmut ha ki jingpule ha kaba ki khynnah ki la jubab ba kumno kin lah ban pynleit jingmut haki jingpule ryngkat ki jingeh bad jingjynjar ba ki mad.
Hadien ka jingioh jingtip bad jingujor na ki khynnah pule bad ki kmie ki kpa na ka liang ki nongïalam ka ka FKJGP North Khasi Hills District haka jingïalam jong u Bah Gabriel Sun Education Secretary, Bah Ricky Majaw Information Secretary, Bah Banroy Wahlang Assistant Information Secretary, mynta ka sngi ki la hiar kyrkieh sha katei ka jaka ban leit peit da la ki jong ki khmat halor ka jingud jingnam ki khynnah, ha kaba la lap shisha ba ka um kaba ki khynnah ki pyndonkam ban dih ka dei ka um jngut kaba dap da ka ktieh kaba long ka jingma kaba khraw ïa ka koit ka khiah.
“Namar ka jingsliang ngim banse ban dih laka dih watla ngi iohi ïa ka dur jong ka um kum ka sha dud, la ong iwei I khynnah pule jong katei ka shlem ai jinghikai ka sorkar bad ïathuh ruh ba bun na ki khynnah kiba kham ioh ki hap ban shu thied na shabar ïa ka um, bad wat ki dawai ba ki ai ki dei kiba la kut tarik kumba la iohi ruh ba uwei u dawai kuli ba la ai ha iwei i khynnah skul u dei u ba la mih tit bad rdem, ka jaka sum kaba rynghang khlem jingker, ka painkhana ba khlem jingkhang”. Ki la ïathuh ruh ba u Principal jong katei ka skul um ju wan sha skul lait noh tang ha ki sngi kyrpang.
Na ka liang ki khynnah skul ki la phah ruh da ka jingthoh sha ki nongïalam ka FKJGP halor ka um jakhlia ba ki hap ban dih nalor ka jingbym biang ka por ai um, ki jhur bala pyut bad ka ja ba ki bam bun kaba khaw ot, watla ka dei ka skul sorkar kaba la mang pisa da ka sorkar pdeng ban pynbiang ïa ki jingdonkam jong ki khynnah skul.
Haba kren sha ki lad pathai khubor na ka liang u Bah Ricky Majaw u la ong ba kum ka seng ka dap da ka jingsngewkhia kaba jur halor ka jingeh kaba ki khynnah pule jong katei ka skul sorkar ki mad kaba la isaitmet wat tang ban peit hadien bala leit ban jurip da ka seng halor ka jingud ki kmie ki kpa bad ki khynnah skul ha na ka liang ki dkhot ka seng ki la lap ïa ka jingshisha baroh ba ki khynnah ki hap ban pyndonkam da ka um kum ka rong sha dud ka la buh jingma shikatdei ïa ka koit ka khiah kumba ki la don ruh ki khynnah kiba la poi hospital bad leit phai ïing, hynrei ki nonghikai katei ka skul ki pyrshang ban ïada ïa ka jingshisha.
Hadien ki jingujor bala lum na ki khynnah skul kiba la ai ruh da ka shithi, na ka liang ka seng ka kyrpad ïa ki bor ba dei peit ban shimkhia ïa katei ka kam khamtam u Deputy Commissioner ka Ri-Bhoi u ba dei ruh u Chairman jong katei ka skul, ha kaba na ka liang ka seng kan sa leit ruh ban ïakynduh ïa u DC ka Ri-Bhoi bad kumjuh ruh u Principal katei ka skul kumba u Principal um don ha katei ka sngi bad ai por ruh 1 bnai ban pynbit pynbiang ïa ki jingdonkam baroh bad ki jingeh jong ki khynnah.
Ka seng ka la maham tyngeh ïa kino kino ki nonghikai bad wat u Principal jong ka JNV Ñiangbari ha Ri-Bhoi District lada ki byrngem ïa ki khynnah skul kiba kren halor ka jingshisha ban pynpaw ïa ki jingeh ba ki ïakynduh ha katei ka shlem pule jong ka sorkar pdeng ka seng kan shim da ki sienjam kiba tyngeh. U Bah Ricky Majaw u la phah da u kyrwoh uba shai sha ki nonghikai jong ka skul ba kim dei ban byrngem ïa ki khynnah skul kiba mih shakhmat ban ïathuh ïa ka jingshisha.