Wat sngew khlaiñ tang haba beh lyer, hadien elekshon phin babe : Metbah

Mairang, Nailar 22: Ha ka jingpynkhreh ne ka jingïakhun elekshon, kiba bun ki ju pynpaw ne kylli ïa ka jingkhlaiñ ne jingtlot u kyrtong da kaba kylli “kumno ka lyer’ bad kiba jubab ruh ki ong, “ka lyer te ka beh sha uta uta ne kata kata”.
Hynrei u President ba rangbah duh jong ka United Democratic Party (UDP) u Bah Metbah Lyngdoh, u la ong ba ha ka elekshon, lada shu ïa shaniah ban jop tang ha ka jingbeh ka lyer, ka jingbabe kan wan beit hadien.
Haba kren ha ka General Council jong ka UDP Mawthadraishan kaba la long ha Kynshi ha ka sngi Saitjaiñ baladep, u President ka UDP u la ong, “Wat sngewkhlaiñ tang ba phi sngew ba ka lyer ka beh sha u kyrtong jong phi, hynrei donkam ban trei shitom haduh ka sngi ba thep vote ruh”, u la ong.
Shuh shuh u Bah Lyngdoh, u la ong ba ka jingkyrshan jong ki paidbah ka dang kylla wat shi taïew shuwa ka sngi thep vote ruh. “Kane ka la jia ha ka elekshon MDC ha Mairang ha u 2019”, la ong u Shongknor ka ïingdorbar Thawaiñ ka jylla.
Ha kane ka jingïalang da ki spah ngut ki nongkyrshan na kiwei pat ki Party ki la wan ban pynïasoh noh sha ka Seng UDP ha Mawthadraishan ban kyrshan ïa u HB Nongsiej, MLA ka Mawthadraishan u ban long biang u kyrtong ka Party ha ka elekshon MLA 2023.
Napdeng kine kiba la wan pynïasoh ki kynthup ruh ïa ki arngut ki kyrtong ba la ïakhun ïa ka elekshon ha ki snem kiba ladep. Kine ki long u Bah Pius Kurbah, uba la ïakhun ïa ka elekshon MLA ha u 2018 na ka Seng Congress. Uwei pat udei u Bah Damien Lyngdoh Marshiangbai, uba la ïakhun ïa ka elekshin MDC na ka HSPDP ha u 2019. Da ka jingwan kine ki kyrtong, ki rangbah kiba la ju ïakhun ïa ka elekshon ha ki snem baladep kiba mynta ki la kyrshan ïa u Bah HB Nongsiej, ki long 6 ngut. Ki 4 ngut kiwei pat ki long u Bah BB Warjri, Ex- MDC, uba la ïakhun ïa ka elekshon MLA ha u 2018 na ka Seng PDF. Nangta kiwei pat ki long u Bah BG Lyngdoh, Bah MH Thabah bad u Bah DM Kharsyntiew.
U Samla Kyrmen Shylla, President ka UDP State Youth Wing, uba la don ha kane ka jingïalang, u la ong ba ki paidbah jong ka Mawthadraishan kim dei ban sngewthuh bakla, hynrei kidei ban ailad biang ïa u Bah Brol sa shisien pat, khnang ba ki kam pynroi kin wan ha ki Shnong ki thaw. U la ong ruh u Bah Nongsiej, udei u briew uba la don bha ka jingtbit ne ka experience kum u nongmihkhmat bad udei ruh uba don ka sur kaba u lah ban kren ne hukum ïa ki ophisar.
Ha kane ka jingïalang nalor ba la pdiang sngewbha ïa kiba la wan pynïasoh sha ka UDP, la pynskhem ruh ïa ki Nongkitkam ba thymmai jong ka UDP Mawthadraishan Circle, Womens’ Wing bad Youth Wing da u Bah Metbah Lyngdoh.