Shillong, Risaw, 17: U MP ka Rajya Sabha Dr. WR Kharlukhi ha ka sngi Thohdieng u la ong ba kano kano ka jingpynïoh jingïarap lyngba ka Members of Parliament Local Area Development (MPLAD) Scheme ym dei ban shim kum ka jingai sngewbha hynrei ka dei ka jingkitkhlieh bad ka kamram jong uno uno u nongmihkhmat paidbah ban phaikhmat sha ki shlem pule hapoh ka Constituency.
U Dr. Kharlukhi ula pynpaw ïa kane ha ka jingplie ïa ka kamra klas kaba la shna thymmai jong ka College of Teacher Education (PGT) Shillong ba la bei pisa hapoh ka MPLAD Scheme 2024–2025.
Ïa kane ka projek, la mang pisa lyngba ka jingkitkhia jong u Dr. W.R Kharlukhi.
U Dr. Kharlukhi u la ïaroh ïa ka College kaba la ïai bteng ban ai jinghikai pyntbit ïa ki nonghikai kiba long ki nongtbeh jingshai ha ka thoh ka pule ha ka imlang ka sahlang lyngba ki jinghikai kiba janai.
Haba pynpaw ïa ka jingdonkam ban pynïar ïa kane ka shlem pule, u Dr. Kharlukhi u la kyntu ïa ki bor pynïaid jong ka College ban ïakren bad u Myntri Rangbah na ka bynta ban ai jingkyrshan ha kaba shna shuh shuh ïa ki jingdonkam hapoh ka College bad ïa ki prokram kiba ïadei katkum ki jingdonkam jong ka pule dangle.
Ka Principal jong ka College ka Dr. Bahunlang Tron, haba kren ha kane ka jingïalang ka la pynpaw ïa ka jingsngewnguh ïa u Dr. Kharlukhi bad ka la ïaiban ba ka thong jong ka College ka long ban pynbiang ïa ki jingdonkam khnang ban pynurlong ïa ka jingangnud jong ka National Education Policy (NEP) 2020.
Ka la pynpaw ïa ki jingeh kiba la ïakynduh ha kaba pynkylla sha ki rukom pule ba thymmai bad ka la pan ïa ka jingïatreilang na ka Sorkar bad na ki nongshim bynta ban ïarap ban pynurlong ïa kane ka jingkylla.
U Bah WL Lyngdoh uba long u President jong ka Governing Body u la pynpaw ïa kijuh ki jingsngew bad u la banjur ba ha ka juk pule puthi kaba mynta, ki jaka hikai pyntbit ïa ki nonghikai ki dei ban pdiang ïa ka rukom treikam ba bun jait ba la pruiddak da ka NEP 2020.
U la kdew ba kum kane ka jingkyrshan ba ïatreilang hapdeng ki nongmihkhmat paidbah bad ki jaka pule ka lah ban long kum ka nuksa na ka bynta ka jingkiew ha ka pule puthi kaba neh ha ka jylla.
Ka jingplie paidbah ïa ka kamra klas ba thymmai ka long ka dak ba la pynskhem biang ïa ka thong jong ka College ban ai ïa ka jinghikai pyntbit ïa ki nonghikai bad ka jingthmu hapoh ka NEP 2020.
