Mawkyrwat, Nohprah 06: Ka ophis u Deputy Commissioner ka South West Khasi Hills District ryngkat ka jingïatreilang bad ka Meghalaya State Rural Livelihood Society (MSRLS), Mawkyrwat C&RD Block, bad ki tnad treikam jong ka Sorkar ha ki laiñ bapher bapher kynthup ruh ïa ki Bank kiba don hapoh South West Khasi Hills District ha ka sngi Thohdieng ki la pynlong ïa ka ïew ïadie lang ne kaba ki la buh ruh kum ka ‘District Level Financial Literacy Campaign-cum-Exhibition 2024’.
Ka jingthmu ka long ban ai jingtip bad jingshai ïa ki paidbah halor kumno ban pynrung ha ki Social Security Schemes (PMJJBY, MSBY, APY bad MHIS), ban tip kham bniah ïa ki financial services bad ki jait ram ba pher na ki Bank, ka jingsam ïa ka jingmyntoi da ki beneficiary haba ïadei bad ki Social Security Schemes (success story), ka don ruh ka Health Check-Up ha kaba ym donkam ban siew pisa, ka awareness jong ki Scheme Sorkar bapher bapher na ki laiñ departments, ka jingïadie ïathied ïa ki mar ki mata ba la pynmih napoh ka South West Khasi Hills District bad ban mad ruh ïa ki jait jingbam khasi ne local.
Haba kren kum u kongsan, u Deputy Commissioner jong ka South West Khasi Hills District bah B. Mawlong, u la ong ba ka jingpynlong ïa kane ka prokram mynta ka sngi kam shym dei eh tang na ka bynta jong ki bank kumba la kdew ha ka jingthoh ka Financial Literacy Campaign hynrei ka dei ruh ka prokram ban don ruh ka jingïadie ïathied ïa ki mar ki mata ba la wanrah da ki paidbah na kylleng ki shnong kum ki jhur ki jhep, ki tiar ki tar, ki mar rep bad kiwei kiwei de.
U la kyrpad ïa ki paidbah kumba ki bor synshar District ki la pynbeit ïa kane ka prokram, ki paidbah ruh kim dei ban shu ïa leit noh kumto mar ïa wai ka jingïalang hynrei kin da shim kabu da kaba rung ha ki sha ki stall ne ki ïing dara ba la pynbeit khnang ba kin ïoh ruh ki jingmyntoi bad kham kyrpang eh kiba don ka jingïadei bad ki bank.
U la pynshlur ruh ïa ki paidbah ba kim dei ban sheptieng ban shim ram (loan) ne don ïa ka Insurance na ka bynta ki jingdonkam jong ki hi lyngba ka jingdon ïa ki bank account ha ki bank bapher bapher hapoh ka distrik. Ha kajuh ka por ula ai ruh ka jingïaroh ïa ki Self Help Groups kiba la pynïaid bha ïa ki kam ki jam jong ki ha manla ki shnong namar da ka jingdon jong ki, ki paidbah ruh ki lah ban shim ïa ki ram ne shim loan na ki SHGs katkum ka jingbuh jong ki.
Hadien ka prokram, paidbah ki la ïoh ban pyndonkam ruh ïa ki 45 tylli ki ïing dara ne ki stall ba la buh kyrpang ha kane ka prokram ha kaba katkum ka jingïoh jingkheiñ ka long ha ka Health Check-up 267 ngut, ha ka MHIS 24 ngut, ha ka ABHA 18. Ha kaba ïa dei bad ka jingwan ki nongrung ha ki stall ki don 622 ngut ha ki Bank Stalls, bad ha ki Line Departments Stall haduh 568 ngut, kiba dei ha ka SHG Loan Sanctioned Letter la sam sha ki 83 ngut kaba kot haduh T. 344.9 lakhs.
Ha ka SHG Loan ba la phah ka long 5 ngut ha ka dor T. 14 lakhs, ha ka PMJJBY 267 ngut, ha ka PMSBY ngut 285, APY 67 ngut, PMJDY 120 ngut, kiba plie account thymmai 39 ngut, ha ka PMEGP la ïoh ban mang na ka bynta ki 5 ngut, KCC 40 ngut, kiba shim ram ne Education Loan iwei, ATM 29 ngut, bad PAI 7 ngut.
Kiwei de kiba la ïadonlang ki long u bah L.T. Tariang, Additional Deputy Commissioner bad Project Director jong ka DRDA, South West Khasi Hills District, u L. Kynjing, MCS, SDO ka Ranikor Civil Sub Division, u bah S Marwein, MCS, BDO ka Ranikor C&RD, u bah Eson A. Khongrymai, District Mission Manager jong ka NRLM ryngkat ki ophisar napoh ki tnad treikam bapher bapher hapoh ka South West Khasi Hills District.
