Shillong, Jymmang 2 : U Myntri ba dei ban peit ia ka tnad kam pohïing jong ka sorkar jylla u ma Lahkmen Rymbui u la kyntu ïa ki khun samla ha ka jylla ba kim dei ban pynïasoh ne rung sha ka tnad pulit tang namar ba ki donkam ïa ka kam hynrei ki dei ban pynïasoh ne rung na ka bynta ba kin ai ka jingshakri sha ka jylla.
ïa kine ki kyntien u la kren mynta ka sngi ha ka jingrakhe ïa ka Jubili Ksiar (Golden jubilee) jong ka 1st Battalion Meghalaya Police naduh ba la pynkylla na ka 7th Assam Police Battalion ha u snem 1972 ha ka shnong Mawiong.
Haba ai ka jingkren ha kane ka sngi na ka liang u Myntri ka tnad u la ong ba “Ka tnad pulit ka dei na ka bynta ka imlang sahlang bad kumjuh ka imlang sahlang ka donkam ïa ki tnad pulit kumta dei ban pynneh ïa ka jingshaniah mar kylliang”.
U bah Lahkmen u la ai ka jingïaroh ïa ki pulit ha ka jylla namar ka dei lyngba ka jinglen lade jong ki pulit ba ka ri bad ka jylla ka don ha ka shong suk shong saiñ.
U la pynpaw ïa ka jingkmen halor ka jingkylla ka jingpyntrei kam ha ka tnad pulit haba ïa nujor bad ka rukom trei ki pulit ha ki por ba la dep.
U la ong ruh ba “Ha kine ki khyndiat snem hi ki kam sniew ki la duna bha ha ka jylla, ha ka ba bun na ki kam sniew wat la ka jia ha kano kano ka kyndong jong ka jylla ruh na ka liang ka tnad pulit ka trei shitom ban khanglad ïa kine ki kam sniew”.
U ma Rymbui u la ai ka jingïaroh ruh ïa ka seng kaikhlaw Hynniewtrep National Liberation Council (HNLC) ba ka la kohnguh ban don ka jingïakren iasuk khlem da buh kyndon, bad kane ka paw ba ki ruh ki kwah ban don ka shong suk shnong shngaiñ ha ka jylla.
U la ong shuh shuh “Ban trei ha ka tnad pulit kam dei ka ba suk namar ba bun ki jingkynthoh hynrei na ka liang ki pulit ha ka jylla ki pyndep thop ïa la ka kamram ka ba la bynshet ha ki”.
U ma Rymbui u la kular ruh ba na ka liang ka sorkar kan ïaleh ban kyrshan ïa ka tnad pulit ha baroh ki liang da ka ba ong “Haba ka tnad pulit ka khlaiñ ka imlang sahlang ruh ka long ka ba skhem bad shngaiñ”.
Ha kane ka sngi u ma Lahkmen Rymbui u la pynlait ruh ïa ka kot jong ka 1st Battalion Meghalaya Police ka ba ïathuh halor ka jingseng ïa kane ka ktem pulit ha kane ka jaka bad kumjuh ki jingai jinghikai bad ka jingshakri ka ba ka 1st battalion ka la ai sha ka jylla.
La ïadon ryngkat lang ha kane ka jingrakhe da ka Special DGP kong I.Nongrang, ka Commandant jong ka 1st Battalion kong Claudia Lyngwa bad kiwei kiwei ki ophisar .
