Wat pynthohbria ïa ka kyrteng u Syiem Duwan Sing u dei u khrawpyrkhat, ai nam ka Hima Sohra da ka surok

Shillong, Risaw 30 : Ka surok naduh shnong Mawkdok shaduh ba don ka ophis u Syiem ka Hima Sohra mynta yn tip noh ïa ka da ka ‘U Duwan Sing Syiem Road’ kum shi bynta ban pynsah-nam pynsah-kyrteng ïa u Syiem Duwan Sing uba la synshar ïa ka Hima Sohra naduh ki snem 1780 terter haduh u snem 1830 ha ki por ba ka Ri Khasi ka la don hapdeng ka jingshah dakhol jaka ha ka Sorkar Phareng (East India Company).
Ha une u snem 2024 ba mynta ka dei ka jingdap 194 snem ka jingkhlad noh u Duwan Sing Syiem uba la synshar slem bha ïa ka Hima Sohra. Katkum ka jingthoh balei la ai nam ïa katei ka surok ha u tei u Syiem da u Bah BV Rymmai, Secretary ka Hima Sohra, la ong ba une u Syiem um dei u Syiem shet-kylla ne u Syiem tap thlong kumba don kiba pyrshang ban pynbudnam ïa u.
La kdew ba ha ka por ba ki Hima Khasi ki la pyrkhat ban ïaleh thma pyrshah ïa ki phareng, kaba mih na ka jingïapher jingmut hapdeng u Syiem Tirot Sing bad u David Scott; namar ka jingpynkheiñ ïa ka soskular kaba ki la ïateh hi ha ka 30 tarik u Naiwieng, 1826.
Ha katei ka por, U Syiem Tirot Sing, Syiem ka Hima Nongkhlaw u la ïawer kylleng ïa ki Hima Khasi ban ïa snoh lang bad u ban ïaleh thma pyrshah ïa ki phareng. Hynrei u Syiem Duwansing um kohnguh khleh bieit khlem da khan da pyrkhat.
La ong ba u Syiem Duwansing u la jah na la ka Hima bad hadien ki tip ba u leit sha Delhi bad Dhaka ha kaba u la leit twad jingmut kumno u phareng na shiliang duriaw u nud ban kob thma ïa ki trai muluk ki trai jaka ha kaba u la shem ba baroh ki Syiem Rithor ki la pyndem lut ha ka Sorkar Phareng.
U Syiem Duwan Sing la lum ïa ka jingïalang bad ki paidbah byllien ki sngap aiu u don ban ong halor ka jingbym treh jong u ban ïaleh da ka thma pyrshah ïa ki phareng bad katkum ka jingthoh ka kdew ba u Syiem Duwansing u la ong, “Kum u Syiem ka long ka kam bieit ïa nga bad kan long kumba nga phah ïa phi ki khun ki hajar lajong ba phin noh ïap sha riat bah”.
U la ong ba yn ïakhun ïa u David Scott ym da ka bor hynrei da ka jabieng bad Khlem pep u David Scott un long u kulai jong ki bad dei ha kane ka nongrim ba ka Dorbar ka la ai bor ha u Syiem ba un ïateh lok bad u David Scott ha 10 tarik u Nailur, 1829 katkum (WJ Allen’s Report).
La ong ba ka Sorkar Phareng ka hap ai bujli da kawei ka jaka sha ka Hima Sohra hadien ba ka la pan jaka ban tei ïa ki Ophis Sorkar hynrei kiwei ki Syiem bad ki Hima Khasi ki la ai sngewbha ïa ka khyndew ka shyiap jong ki sha ka Sorkar Phareng.
U Syiem Duwansing um tip ruh ba u utei u David Scott u dei uba la shah beh kthong ha ki khlawait u Syiem Tirot Sing, ong ka kot kaba la kdew ba u Syiem Duwansing kum u briew ba stad ba shemphang u shim ïa u David Scott kum uta u briew uba lah ban ïateh lok ban ïarap mar kylliang da kaba ïasoi ïasaiñ lang ïa ka soskular ne kata ka Agreement.
Na ka kot la ong ba u David Scott um shym la phet marwei na Nongkhlaw pynban u phet ryngkat bad ki phud ki pyrton bad ki nongbud nongrap jong u. Hato lah mo ban ngeit ba u Syiem Duwansing un lah ban buhrieh ïa ki ne haduh katno ki thlong u Syiem Duwansing u don ban tap ïa ki bad baroh ki dei tang ki jingpynbud nam ïa u Syiem Duwansing namar u dei u Syiem uba khraw bad pawnam ha katei ka por.
La ong ba ki khlawait u Tirot Sing kim tip shano u poi u David Scott….kumba ong mano re ba ki lapmiet ka tam pisa ba ber ïa ïaid u David Scott. Ynda kim lap syrwet shuh ki kynnoh pynbudnam beit ïa kiwei hana ba pynrieh u Syiem Sohra bad ym tip la u David Scott u phet shisha sha Sohra ne sha kiwei pat ki Hima”.
U David Scott u lah ban phet sha Shella bad ïa kane la sakhi shai da ka soskular bad u Wahadadar Shella kata ha ka 3 tarik u Nailur, 1829. Bad hadien shi taiew u David Scott u wan poi ha Sohra ban ïateh soskular pat bad u Syiem Duwansing. Kumta ka Hima ka ïohi ïa u Syiem Duwansing la um dei u Khla ka wait hynrei u dei u Khla ka Jabieng…u briew ba stad um ju talaiñ da ka wait hynrei u talaiñ da ka ktien bad ka thma ka wait kam ju khie lymda don shwa ka thma ktien.
Ka Hima ka ïohi ba lyngba ka jingstad u Syiem Duwansing bad hadien ka jingiap jong u la wan ki missionary kiba la seng nongrim ïa ka Ktien thoh Ktien tar jong ka Jaidbynriew Khasi ha ka Ktien Sohra bad mynta ka la kylla long ka Ktien pdeng jong ka Jaidbynriew Khasi Jaintia hi baroh kawei.
Kumta nalor ka jingkieng kaba la ai nam ha utei u Syiem, ha ka 30 tarik u Risaw, 2024, la pynïeng sa ïa u mot ha Mawkdok kum ka dak ban ai nam ïa ka surok ha u Duwan Sing Syiem ha kaba la plie ïa une u mot da u Bah Gavin M Mylliem, MLA ka Sohra Constituency ha ka jingïadonlang u Bah Titosstarwell Chyne, MDC ka Sohra.
Nalor kine la ïa donlang da u Pa’iem Freeman Sing Syiem, Syiem ka Hima Sohra, ki ophisar na ka Sohra Civil Sub-Division, ki ophisar na ka tnad General Administrative Department (GAD) ka Sorkar Jylla kata ka Kong YR Mawlong, Deputy Secretary, u Bah BV Rymmai, Secretary Hima Sohra, u Bah Allan West, President ka Meghalaya Rural Tourism Forum, ki Myntri Hima nalor ki Sirdar, ki nongïalam shnong, ka Kong C Syiem, Syiem Sad, u Pa’iem M Syiem, Syiem Khynnah, ki bor pulit ka Sohra Division, nalor kiwei pat.
Kane ka jingithuh ka Sorkar Jylla ïa u Duwan Sing Syiem kum u Syiem ba khraw napdeng ki Hima Khasi ka long katkum ka shithi jingpynbna ka tnad GAD ha ka 29 tarik u Naitung, 2024 ba la soi da u Secretary ka tnad GAD, u Bah Cyril V Darlong Diengdoh, IAS kata hadien ka jingkyrpad ka Hima Sohra.
Ha kane ka sngi la pynshongkun ïa kane ka prokram da ki jingrwai ai nam ïa u Duwan Sing Syiem nalor ki jingshad tynrai da ki khun ki hajar ka Hima Sohra.