“Wat pynthohbria da kaba rung dkhot sengbhalang tang ban ïoh kamai pisa ha ka kyrteng jong ka seng” : Eldie N. Lyngdoh

Mawkyrwat, Lber 29: U Vice President ka Federation of Khasi Jaiñtia & Garo Peoples (FKJGP) Central Body, bah Eldie N. Lyngdoh ha ka jingkren jong u ha ka jingïalang ban pynkha thymmai ïa ka circle ka ‘FKJGP Rangblang Circle’ u la kyntu ba kum ki dkhot jong ka seng kim dei da lei lei ban rung dkhot bad pynthohbria tang ban ïoh kamai pisa ha ka kyrteng jong ka seng, hynrei ki dei ban ïaid ryngkat ryngkat bad u paidbah ban ïa kit ïa kano kano ka kam.
Haba kren kyntu na ka bynta ki dkhot kiba thymmai jong ka Federation of Khasi Jaiñtia & Garo Peoples (FKJGP) Ranblang Circle u la ong ba kin long kiba shim ïa ka jingkitkhlieh khamtam ïa ka dong ka thaiñ, ka jaidbynriew la jong da kaba don ïa ka mynsiem jong ka jingsngewrit, long borabor briew kiba jemnud, long kiba shlur bad kin ym ‘tieng ym smiej ban ïaleh bad ïada ïa la ka jong ka jaidbynriew rit paid na ka jingshah ïuh roit ha kiwei pat ki jaidbynriew shi sngi ha la jong ka ri.
U Balse Kharbani, General Secretary jong ka FKJGP, South West Khasi Hills District u la pynpaw ïa ka jingsngewkmen kaba khraw ha kaba na ka liang ka distrik ka ïoh ban pynïar biang ïa ka jingtrei kam ka seng lyngba ka jingïoh ban jied ïa ka circle kaba thymmai kaba la tip kum ka ‘FKJGP Rangblang Circle’.
Namarkata, u la kyntu ïa ki nongïalam ki ban sa shimti ïa ka lyngkor ban shakri ïa ka dong ka thaiñ bad ka jaidbynruew hi baroh kawei, ba kum ki nongïalam ki dei ban don ka mynsiem kaba sngewrit bad kiba don ka jingïalong shi tylli hapoh ka seng. U la ong nangne shakhmat kum ki nongïalam kin hap mad bun ki jingtynjuh ki jingwoh kjet hangne hangtei hynrei kynmaw kum kim dei ban kynran dien namar kita, ki dei ki jingïaid lynti kum ki nongïalam jong ka jaidbynriew.
“Kan don ka por ba kin hap ban duh thiah duh dem”, ong u bah Balse, kumta u la kyntu ba haba, ki don ha ka seng kim dei ban khmih lynti ba ka seng kan leh ei ei na ka bynta jong ki hynrei ma ki kum ki dkhot ka seng ki dei ban leh ei ei na ka bynta ka jaidbynriew, bad na ka pateng ban wan.
Haba kyntu biang ïa ki nongïalam jong ka circle kaba thymmai, u la ong ba haba ki ki ïaid ha ka lynti na ka bynta ka jingshakri ïa ka ri bad ka jaidbynriew kin sa shah kawang maw ha ki ‘riew shim kabu na ka bynta ban myntoi shimet hynrei kynmaw ki dei ban don ka mynsiem kaba synrang, na ka bynta ban buh ïa ka lawei kaba bha na ka bynta ki pateng ban.
Nongkitkam ba thymmai jong ka Federation of Khasi Jaintia & Garo People (FKJGP) jong ka Rangblang Circle ki long President u Rockyfeller Paliar, Vice President u Phlekstar Waniang, Secretary u Shinestarling Thongni, Assistant Secretary u Fulmark Paliar bad u Carmel Iawphniaw, Education Secretary u Mendestone Thyrniang, Information Secretary u. Pynhunbor Iawphniaw, Organizing Secretary u Micheal Sangriang, Assistant Organizing Secretary u Philip Lyngkhoi, Agriculture Secretary u Jaian Waniang, Sports Secretary u Francis Kharjahrin, Chief Adviser u P. Paliar bad u B. Thongni bad kynthup ruh ïa ki dkhot kata u Petersbun Thongni, u Shandra Thongni, u Kyrshan lawphniaw, u Kyrmenskhem Paliar, u Floster lawphniaw bad u Forticroy Paliar.
Ïa ka jingïalang la pynlong ha Rangblang, Sasniang, South West Khasi Hills District bad ha kane ka sngi la ïadonlang naduh u Kennes Nonglait, Working President jong ka FKJGP South West Khasi Hills District bad ki rangbah shnong jong ka dong ka thaiñ bah G. Iawphniaw bad kiwei kiwei.