Nongstoiñ, Nailur 24: Kiba haïing hasem jong ka heprit Iwanpynkmen Nongsiej mynta ka sngi 24 tarik Nailur, ki la ïoh ban rah noh ïa ka metïap jong ka na Civil Hospital Nongstoiñ bad hadien pat la rah noh sha ka ïing jong ka ha ka shnong Kseh Kohlong, ka kyntoid shnong kaba la tip kum ka Pamphyrnai.
Haba ïakren bad u bah Sholestar Nongsiej u ba dei u kñi jong katei ka khynnah, u la ïathuh ba ha ka 20 tarik katei ka heprit hadien ba ka la dep sum dep sleh, ka la song ïa la ki jaiñ bad ka la mih na ïing ym tip shano ka thmu ban leit. Hynrei, ka jingbym wan phai shuh ha la ïing naduh katei ka sngi bad lap pynban da kane ka jingjia, ka long kaei kaei kaba ki khlem poi pyrkhat.
Shuh shuh, u la ong ba ki la don katto katne kiba kynthoh sniew ïa ka shnong, da kaba kynnoh ba ka dei ka shnong ba bun menshohnoh. Kane ka dei kaei kaei kaba kin ym lah ban pdiang, namar la lap shai ba kam don kano kano kaba kum kata.
Ha kaba ïadei bad katei ka kyntien kynnoh menshohnoh, na ka liang u bah Ïoannis Lyngdoh sordar shnong Kseh Kohlong ruh, u la maham tyngeh ïa kitei ki briew ba kim dei shuh ban dang ïai mlien ban kynthoh sniew khlem nongrim, lym kumta ka shnong kan sa leh ïa kaba donkam.
Kumban shu pynkynmaw ba kane khynnah kaba dang 14 snem ka karta kaba la jah naduh ka 20 tarik sngi saitjaiñ mynta u bnai Nailur 2025, la lap noh mynnin ka 23 tarik ha ka por 12 baje ei ei nohphai sngi da ki katto katne ngut ki briew kiba leit kheit Tit na kawei ka jaka ba long khlaw malu mala bad kaba pajih na ka ïing sah jong katei ka samla lud.
Katei ka samla ka dei kaba dang shong Class Six bad kaba ju pule ha ka skul Kormawleiñ RC UP School Kseh Kohlong. Mynta ka sngi hi kaba dei 24 tarik Nailur la tep noh ïa katei ka khynnah ha u lum jingtep ka balang Presbyterian Kseh Kohlong.
