Nongstoiñ, Ïaïong 14: Lai snem duna naduh ba u Conrad Kongal Sangma Myntri Rangbah ka jylla u la leit ban buh mawnongrim bad ban plie ïa Rimuliang C&RD Block ha ka shnong Nonglang West Khasi Hills District, hynrei haduh mynta ym don ei ei satia.
Lah ban pynkynmaw ba la plie ruh ka ophis ba shi por da kaba wai ïa ka ïing jong ka kong Bianglin Wanñiang, hynrei lai bnai mynshuwa la pynkynriah noh na katei ka ïing briew sha ka ïing dorbar jong ka shnong bad haduh mynta katei ka ïing dorbar ka la kylla long ka ophis ba shipor jong ka Rimuliang C&RD Block.
Ka jingpynkynriah noh ïa katei ka ophis treikam ba shipor sha katei ka ïing dorbar, ka la pynlyngngoh ïa ki paitbah jong ka thaiñ Muliang baroh kawei, namar hadien ba ka sorkar ka la dep pynbna ba ka Block ophis jong ka Rimuliang ka dei ha ka shnong Nonglang, ki don ki briew ki ba kwah ba katei ka Block ophis ka dei ban don ha shnong jong ki, khnang ba ki paitbah na ki thaiñ Aradonga bad kiwei kiwei ki shnong khappud kin kham jan haba ki wan donkam.
Ki la dawa ruh ban rah noh ïa katei ka Block ophis sha ki thaiñ Tynghor. Ha kaba ïadei bad katei ka jingdawa ki la don bun ki paitbah kiba la kynnoh ïa u bah K.P.Pangñiang MLA barim ka Rambrai Jyrngam ba dei ma u, u ba don bynta ha katei ka kam.
Ha kaba ïadei bad ka jingdawa ban pynkynriah noh ïa ka Rimuliang C&RD Block na shnong Nonglang sha kiwei pat ki jaka, haduh kine ki sngi ym shym la lap dien satia la katei ka jingdawa jong ki katto katne ki briew kiba la pynlong ruh da ka jingïalang ha u snem la dep kan urlong ne em.
Haba pyrshang ban kylli bad twad jingmut na ki paitbah jong ka shnong Nonglang, ki la ong ba kin ym ailad satia ba kino kino ki kynhun kin wan ban tuklar halor katei ka kam ,namar ka sorkar ka la dep leh ïa la ka jong ka kamram bad ïa ka jaka na ka bynta ban shna ïa ka Block ophis ruh la dep ai sngewbha da ki nong shong shnong na Nonglang.
Ka dei ruh ka jaka kaba bit ba biang kaba don harud ka surok bah bad lada katei ka jaka kam pat dap, ki trai jong katei ka jaka ki la ong ba kin kham pynheh shuh shuh ïa katei ka jaka ba la dep tew dep woh da ki briew sorkar.
Nalor kata ki trai kiba la ai sngewbha ïa katei ka jaka ki la dep pynkhuid bad pom lut ïa ki dieng, na ka bynta ban pynsuk ban shna ïa ka Block ophis bad kiwei kiwei ki ïing kum ki hall, ki jaka sah jong ki nongtrei bad kiwei kiwei bad ki kyrmen ruh ba ka sorkar kan ym shet kylla ne sngap ïa ka jingdawa jong ki riew khwan myntoi.
