Wat pynkylla politik bad ïalam bakla halor ka kam pynbeit pud, ong u Dy. CM ïa ka AITC

Shillong, Naitung, 27: U Symbud Myntri Rangbah ka jylla u bah Prestone Tynsong u la ong ïa ki nongïalam ka All India Trinamool Congress (AITC) ban sangeh noh mardor na kaba leh politik ne pynkylla politik bad ïalam bakla ïa ki paidbah halor ka kam ïa pynbeit pud hapdeng ka Meghalaya bad Assam namar haba ki don ha ka bor kim leh ei ei mynta ba ka MDA ka shim khia ban pynbeit iï kane ka kam ba sahteng la 50 snem sdang ban ïalam bakla ïa ki paidbah.
“Ki AITC ki pynkylla politik ïa ka kam ïa pynbeit pud bad ïalam bakla ruh ïaki paidbah hynrei nga kwah ban ïathuh ïa phi ba ki paidbah nongthep vote kim dei kiba biej ha kine ki sngi ba mynta ki sngewthuh bad ïohi ïa ki jingshisha bad to ngin sa ïa peit ha u 2023” ong u Symbud Myntri Rangbah.
U la ong ka AITC hapoh ka jingïalam jong u Dr Mukul Sangma ki la sngewdiaw shikatdei eh namar ha u 2011-2012 ka sorkar hapoh ka jingïalam jongu ( ha ka por ba u don ha ka Congress) u la phah ïaki kot ki sla sha ka sorkar Assam hynrei ym shym la shim khia da ka Assam ban pynbeit ïa pud u sam.
“Mynta ba ngi bat ïa ka jingsynshar naduh u 2018 bad ngi la ïasoi ïa ka MoU ban ïa pynbeit pud bad kumta ka jingïapynbeit pud ruh ka la ïaid shakhmat kumta u (Mukul) sngewsyier ïa ka saiñ pyrthei jongu bad sdang sa ka ban ïalam bakla ïa ki paidbah.” ong biang u bah Prestone.
Kumta u bah Prestone u la kyntu ïa ki AITC ba kim dei ban kynnoh ïa ka sorkar MDA namar da kajuh ka jingtyrwa jong u Dr Mukul la bud ban pynbeit ïa u pud u sam bad ka Assam ym dei kaba la wanrah thymmai da kane ka sorkar.
U la ong shuh shuh ba ka jingkular ka AITC ban pyndam noh ïa ka MoU ba la ïasoi lada ki wan ha ka bor ha u 2023 ka long kaba sngewsih namar ka pynpaw shai ba kim kwah da lei lei ruh ba u pud jong ki arjylla un beit noh ne ba ka jylla Meghalaya kan don la u jong u pud u sam khnang ban yn ym mih shuh ki jingïakynad ha khappud.
“ U Dr Mukul uba dei u nongïalam ka AITC u la ong ba lada ki wan ha ka bor kin pyndam noh ïa ka MoU ba la ïasoi. Ka long kaba sngewsih lada u leh ïa kata ka mut um kwah ba ka jingpynbeit pud kan jia hapdeng ka Meghalaya bad Assam. U kwah ban ïai bteng beit ban ïa kajia khappud haduh ban da wai ka pyrthei kaba ym lah ban long. Ngi kular ba ka MDA hapoh ka jingïalam jongka NPP kan bat skhem la ka kular ban pyndep beit ïa kane ka jingïapynbeit pud bad ka Assam”. pynkut u bah Prestone.