Shillong, Ïaiong 07 : U MLA ka Mawkynrew, Bah Banteidor Lyngdoh ba dei ruh u Myntri ka tnad Kamrep, ha ka sngi Palei u la sam haduh palat 100 tylli M-Tabs sha ki samla pule na katei ka thaiñ ha ka jingïalang kaba long ha Holy Cross Higher Secondary, Mawkynrew ha ryngkat ka jingdonlang u Principal ka skul, u Fr. Anthony nangta ki nonghikai bad ki samla pule.
Haba kren ha kane ka jingïalang, u MLA u la kyntu ïa ki samla pule ba kim dei satia ban pyndonkam bakla ïa kitei ki tablet hynrei ba kin pyndonkam hok na ka bynta ka jingmyntoi jong ki hi. “Lyngba kine ki Tablet nga ngeit ba phin lah ban leh bha ha ki jingpule jong phi khnang ba phin lah pat ban pass bha ha ki eksam,” la bynrap shuh shuh u MLA.
Ha kane ka sngi, u MLA u la sakhi lang ruh ïa ka prokram kaba kham kyrpang kaba ym ju kham don ha ki skul ba don shabar sor ba la tip kum ka Investiture Ceremony.
