Nongpoh, Risaw 30: U heh pulit ka Ri-Bhoi u VS Rathore hadien ka jingpynbeit bad pyni nuksa ïaki rukom ïaid kali mynta ka sngi ha Umsning By Pass u la ong ba hadien ka jingbthah ka sorkar jylla ban pynduh noh ïaka VIP Culture, kum ki pulit kila shimkhia bha ïa kane ka kam namar haki jingtalasi bala dep ki pulit kim map wat ki kali jong ki heh ki haiñ ne ki kali VIP kiba pynkheiñ aiñ.
“Ngin talasi naphang beit ïa baroh bad ym don heh ne rit, bad kino kino kiba pynkheiñ aiñ kin ngat beit haki kyndon aiñ” la ong u SSP da kaba bynrap ruh ba ki kali pulit ne ki kali VIP kim dei ban shim kabu ban pyndonkam kulmar ïaki siren lait noh tang haka por ba donkam eh.
Kane ka jingtalasi jong ki pulit bad ka jinghikai kam dei satia ka jingpynthud ïaki paidbah hynrei ban hikai ba ki paidbah ki dei ban tip ïaka rukom ñiah kali ban pyndonkam ruh ïaki seatbelt, ki helmet haba mih sha surok da ki kali ne thuk thuk ban shngaiñ ki paidbah haka leit ka wan bad ban pynduna ïaki jingjia aksiden bad ki jingjia ba sngewsih.
U la bthah ruh ïaki pulit ne ki kali VIP ba kim dei ban ai siren haki jaka skul ne hospital namar kane ka pynthud ïaki khynnah pule bad ki nongpang, hynrei ki don ki khep ba ki pulit ki beh kam kyrkieh haba don kano kano ka jingjia ba kyrkieh kane kam lah lait lehse ka jingkloi ki pulit kan pynim ïaki mynsiem briew, hynrei kum ki pulit kin ïaleh katba lah ban nym pyndonkam pat ïaki siren.
Shuh shuh, u la kyrpad ruh ïaki paidbah lada ki iohi ïa kino kino ki nongpynkheiñ aiñ ki lah ban record ïaki video bad shondur bad phah sha ki pulit khnang ba ki pulit kin ioh ban leh ïa kaba donkam.
