Wat pyndonkam bakla ïa ki khynnah ha ka por election maham ka tnad Election ïa ki 9 tylli ki Party

Shillong, Naitung 19 : Ka tnad Election lyngba ka District Election Officer (DEO) ka la maham ïa ki 9 tylli ki Seng Saiñ Pyrthei (Political Party) ba kim bit da lei lei ruh ban pyndonkam bakla ïa ki khynnah ha ka por ïalap election jongki.
ïa kane ka shithi mana ïa ki seng saiñ pyrthei la phah da ka DEO sha kitei ki 9 tylli ki seng saiñ pyrthei ha ka 6 tarik mynta u bnai.
Kat kum katei ka shithi la pynpaw ba dang ha kane ka election MLA ba la dep long ha u 2023, ka DEO ka la ïoh pdiang ki jingujor ba ki seng saiñ pyrthei ki pyndonkam da ki khynnah ha ka por ïalap election jongki khamtam haba ïaid rally bad leit pyrta kylleng kylleng.
ïa kane ka jingpyndonkam ïa ki khynnah ha ka por election la khang pyrshah da ka National Commission for Protection of Child Rights kat kum ka jingpynmih hukum ha ka 20 tarik Kyllalyngkot 2017 bad kumjuh ruh ba la pynmih hukum wat da ka Election Commission of India kat kum ka shithi 21 tarik Rymphang 2017.
“ Kumta ban khanglad ba kum kine ki jingjia kin ym jia shuh kata ban pyndonkam ïa ki kh ynnah ha ka por election khamtam ha ka Election MDC sha ka KHADC ban long ha ka 2024 bad ka Election MP Lok Sabha 2024 ka long kaba donkam eh ba baroh ki seng saiñ pyrthei kin ïoh jingtip bniah halor kane. Namarkata la bthah ruh ïa baroh ki seng saiñ pyrthei ban kiar na kaba pyndonkam ïa ki khynnah ha ka por ïalap election jongki bad lada lap ïa kino kino kiba pynkheiñ kin shah pynshitom kat kum ki kyndon aiñ” ong ka jingpynbna na ka DEO.
Ki khyndai tylli ki seng sain pyrthei kiba la ïoh shithi na ka DEO ki long ka National People’s Party (NPP), Voice of the People Party (VPP), Indian National Congress (INC), Hill State People Democratic Party (HSPDP), People’s Democratic Front (PDF), United Democratic Party (UDP), All India Trinamool Congress (AITC), Bharatiya Janata Party (BJP) bad Khun Hynniewtrep National Awakening Movement (KHNAM).