Wat pyndonkam bakla ban kit ïa kiwei pat kiba long pyrshah ha ka imlang sahlang: Renik

Mawkyrwat, Jylliew 03: U bah Renikton Lyngdoh Tongkhar, MLA ka Mawkyrwat Constituency mynta ka sngi u la ïoh ban pyllait paidbah ïa ka kali kit nongpang ne Ambulance jong ka Hynniewtrep Achiks’ National Movement (HANM) Mawlangwir Unit ha kaba la pynlong ïa ka jingïalang ha phyllaw jong ka ophis treikam jong ka seng HANM ha Shnong Mawlangwir, South West Khasi Hills District.
Ïa kane kali kit nongpang (Ambulance) ka ban sa pynïaid da ka HANM la ot ribon da u MLA Mawkyrwat Constituency, bah Renikton Lyngdoh Tongkhar ha ryngkat da ka jingïadonlang ruh u bah Lamphrang Kharbani, President Rangbah ka HANM Central Body u bah Lambokstar Marweiñ, President ka HANM South West Khasi Hills District, ki dkhot jong ka seng bad kiwei de ki kynhun Sengbhalang bapher bapher jong ka dong ka thaiñ Mawkyrwat.
Ha shuwa ban plie paidbah ïa ka kali kit nongpang jong ka seng, la ïoh ka jingkren lamphrang na u President jong ka HANM South West Khasi Hills District, bah Lambokstar Marweiñ ha kaba kum u nongïalam jong ka seng u da thrang ban shakri ïa kiwei bad ïa ka jaidbynriew ym tang da ka ktien hynrei lyngba ki kam.
U la ïathuh ruh ba ïa kane ka kali, u la pynlut hi da lade shimet hadien ba u la ïohi ïa shibun ki jingeh ba ki paidbah jong ka dong ka thaiñ ki ïa kynduh ha kaba ïa dei bad ka kit ka bah, ka pang ka shitom, namar sha kane ka thaiñ ki dang duna shibun ki kali kit nongpang bad da ka jingïoh ban pyllait ïa kane ka kali kan sa long ka jingïarap shibun ïa ki paidbah bad na ka bynta kito ki briew kiba donkam jingïarap.
Na ka liang u kongsan, u bah Renikton Lyngdoh Tongkhar ha ka jingkren jong u u la ai ka jingïaroh ïa ka Hynñiewtrep Achiks’ National Movement (HANM) ha kaba ka la lah ban leh ïa kaba bha tam ha ka imlang sahlang, khamtam ha ka pang ka shitom ka dei kawei kaba ktah ïa ka imlang sahlang ha ka ïap ka im. “Lyngba ka jinglah jong ka HANM ban pyllait paidbah ïa kane ka kali kit nongpang kan ïarap shibun ïa ki briew kaba donkam ha ka por kaba kyrkih eh”, ong u bah Renik.
U bah Renik ula buh ruh ki kyntien sneng kyntu ba hadien ba la ïoh ban pyllait pdiabah, ki nongpynïaid ki dei ban ai ka jingshakri kaba hok bad ba bha tam na ka bynta ki paidbah bad ruh kim dei ban pyndonkam bakla ïa kane ka kali da kaba shim kabu ban kit ïa kiwei pat kiba long pyrshah ha ka imlang sahlang hynrei dei ban pynïaid ha ka lynti ba dei bad ka akor ka burom khnang ba ki briew kin ïoh ïa ka jingshaniah bad ba kan nang ïai kiew ha ki kam baroh.
Kiwei pat ki nongkren kiba la ai mynsiem ha ryngkat ki kyntien sneng bad kyntien jingkyrkhu kyrdoh ïa ka HANM ki kynthup ïa u samla Steveford Marweiñ, MCS, EAC, South West Khasi Hills District, u bah P. Wanniang, u bah Koland Lyngdoh, Secretary jong ka Shnong Mawlangwir bad kiwei kiwei de.