Wat phohsniew lynti Rel katba ym pat don ki aiñ kiba khlaiñ, maham ka KSU na Jaiñtia

Shillong, Rymphang, 19: Ka Khasi Students Union na East bad na West Jaiñtia Hills District ka la kren shai ba ka Sorkar Pdeng lane ka Northeast Frontier Railways (NFR) kim dei ban phohsniew ban pynpoi ïa ka lynti rel sha rilum Jaiñtia katba ym pat don ki aiñ kiba khlaiñ.
“Halor ka jingmih ha ki katto katne ki lad pathai khubor ba ka Northeast Frontier Railways (NFR) ka thmu ban sorjamin biang sha ka rilum Jaiñtia na bynta ka lynti rel bad pynkloi noh ïa ka jingshna ïa ka lynti rel ha rilum Jaiñtia ka seng ka phah ïa ka khubor sha ka NFR ba ynnai tynruh bad ynnai ai ding halor ka lynti rel namar ngi long kiba la pynkhreh ban ïatyngkhuh lada leh da kabor,” la ong u kyrwoh ba la phah na ka KSU East bad West Jaiñtia Hills District Unit sha ki lad pathai khubor ha ka sngi Balang.
“Ka jingkwah khah khah jong ka NFR ban wanrah ïa ka lynti rel sha kine ki thaiñ ka la poi haduh u pud ba kam kheiñ snep shuh ïa ka Jaiñtia Hills Autonomous District Council (JHADC) ban ïoh ïa ka No Objection Certificate (NOC) ban ïaid shakhmat ha kaba ïadei bad ka jingpyntrei ïa ka lynti Rel. Ka jingthmu jong ka NFR ban sorjamin biang ïa ka lynti rel sha rilum Jaiñtia kam kheiñ snep ruh wat ïa ka rai jong ka Sorkar Jylla,” la ong ka seng ha u kyrwoh.
“Halor kine kiei kiei baroh , ka KSU ka maham ïa ka NFR ba kam dei ban leh tam bad da lei lei ngin ym ailad ïa ka jingpyntrei ïa ka lynti rel ba kan ïaid sha khmat wat lada ka Sorkar ka thom biang da ka bor kumba ka la jia ha kine ki khyndiat bnai kiba la dep,” la maham ka seng.
Ka seng ka dawa ïa ka JHADC ba kam dei satia ban ai No objection Certificate (NoC) sha ka Northeast Frontier Railways (NFR) ne sha ka Sorkar ban pynpoi ïa ka lynti rel ha ki bynta jong ka rilum Jaiñtia katba ka Sorkar kam pat lah ban wanrah ïa ki aiñ kiba khlaiñ kiba ïada na ka jingwan tuid kyrthep ki poiei hapoh ka Bri u Hynñiewtrep.
Kane ka jingpyrshah jong ka seng ka long hadien ba la mih haki lad pathai khubor ba ka Northeast Frontier Railways ka don jingthmu biang ban sorjamin ïa ka lynti shna rel na Bhoksong, Rajagaon, Baithalangso, Jengkha, Kherani bad Umrangso ka ban pynïaosh haduh Jowai.
Ka seng ka pynsngew sha ka JHADC ba kan pyrkhat rangbah bad ban ym ai NoC ïa ka NFR kaba dei ban khmih ïa kane ka projek. Ka seng ka ban jur ïa ka District Council kaba long ka stieh ïada jong ka jaidbynriew ba kan da pyrkhat sani bha halor kane ban ym ai satia ïa ka NoC. Ka seng ka khmihlynti ba ki nongïalam bad ki nongmihkhmat jong ka JHADC kin dei ban don kajuh ka sur halor ka lynti Rel.
Ka seng kan sa aiti ruh da ka jingthoh sha ka Sorkar lyngba u Deputy Commisisoner ban pynpaw ïa ka jingpyrshah ban pynpoi ïa ka lynti Rel ha rilum Jaiñtia.
“Ka seng ka iengskhem halor kane ka mat katba ym pat don ki aiñ kiba khlaiñ ban ïada ïa ngi kum ka jaidbynriew ritpaid, ai ba ka jingïakren halor ka lynti Rel kan sangeh shwa. Ka seng, naduh u snem 1988 ka la pyrshah ïa kane ka jingthmu jong ka Sorkar ban iuhroit ïa ka jaidbynriew bad kan ïai pyrshah katba ka Sorkar kam pat pyrkhat thymmai ban wanrah ïa ki aiñ kiba khlaiñ ban ïada ïa ngi,” ong u kyrwoh
Kum ban shu pynkynmaw, ka Sorkar ka la pyrshang ban pyntrei ïa ka projek na Tetelia sha Byrnihat hynrei ka seng ka la pynpulom ïa kane ka jingthmu da kaba pyrshah jur bad pynsangeh ïa kane ka projek ha u snem 2017.
Ka seng ka kyrpad bad wer ruh ïa ki Dorbar Shnong, ïa ki paidbah bad khamtam ïa ki MLA bad MP ba kin ïatreilang halor kane ka kam bad bynrap ruh ba ka seng kan nang ïai buddien ïa kane ka kam bad shim ruh ki lad ki lynti ban pynshai sha u paidbah halor ka jingma kiba ap lada wan ka lynti Rel.
Ka seng ka sngew ban pynpaw ruh sha ka Sorkar ba kam dei ban im sngi tang ïa ka lynti Rel hynrei dei ban pynleit jingmut bad pynurlong ban wanrah shwa ïa ka roi ka par sha ki paidbah ka thaiñ naduh ka surok, ka koit ka khiah, ka pule ka dangle bad kumta ter ter, la bynrap u kyrwoh na ka seng.
Ki shnat ka seng baroh artylli ki la pynpaw ïa ka jingpyrshah ban wanrah ïa ka lynti Rel namarba ka seng kam kwah ba ka rilum Jaiñtia kan long ka khyrdop ïa ki mynder ri kumba la jia ha ka jylla Assam kaba bun ki mynder ri kiba rung ba mih lyngba ka Assam kumba long ka Karimganj.
“Ngi la kren shai ba katba ka jylla Meghalaya kam pat biang ïa ki aiñ ki ban ïada kumta ngin nym ailad ban pdiang ïa ka lynti Rel,” la maham shuh shuh ka KSU.