Wat phai tang sha ka Reservation Policy long kiba kot bor bad don ka mynsiem ban ïakhun : CM

Shillong, Nailar 09 : U Myntri Rangbah ka Jylla Conrad K Sangma, ha ka sngi Balang ula kyntu ïa ki samla riewlum jong ka thaiñ Shatei Lam Mihngi ba kin khmih ne phai palat tang sha ka Reservation Policy hynrei dei ban long kiba kot bor bad don ka mynsiem ban ïakhun ha ka ban ïaknieh wan shakhmat (compete) bad ki samla ba kynsai ha ka pyrthei.
U Myntri Rangbah ula kren ïa kane ha ka jingrakhe ïa ka International Day jong ka World Indigenous People ba la pyn long da ka North East Indigenous People’s Forum (NEIPF), Meghalaya Chapter ha Multi Conventional Hall, ha NEHU Campus, Shillong.
U Myntri Rangbah ula ong ba ka long kaba kongsan ban pynkylla ïa ka jingmut jingpyrkhat jong ki briew khamtam jong ki paid riewlum ka Jylla bad ban sangeh noh ïa ka jingkhmih lynti ba kan sa don ka jingbuh bhah kyrpang ha baroh ki kam ki kam.
“Ngin hap ban khmih palat ïa ka reservation bad ka jingmut jingpyrkhat jong ki samla ka thaiñ Shatei Lam Mihngi ka dei ban long ki ban kot bor ban ïaknieh wan shakhmat (compete) bad kino kino ki samla ha ka pyrthei” ula ban jur.
U Conrad ula pyntip ba ki don shibun jait ki ishu jong ki paid riewlum ka thaiñ Shatei Lam Mihngi kiba u sngewkhia shisha bad pyntip ba ki seng saiñ pyrthei bapher bapher lane ki kynhun seng bapher bapher lane ki Forum ki don ïa kajuh ka thong haba phai sha ki paid riewlum “(Kane ka dei) ban ïada ïala ka snap kyrpang, ïala ka tynrai bad ïa kaei kaba ngi dei kaba pynïapher ïa ngi bad kiwei pat ki jaidbynriew nalor ban sngew sarong ïala ka snap lajong”.
Hynrei ula maham pat da kaba ong ba ka biang eh ban don ïa ka snap kyrpang bad ban sngew sarong ïa ka lajong, hynrei ym dei pat ban shu kheiñ sting ïa kiei kiei baroh.
U Myntri Rangbah ula kyntu ïa ka NEIPF ban ïaleh ha kaban buh jingthoh noh halor ki snap kyrpang jong ki paid riewlum bapher bapher ka thaiñ Shatei Lam Mihngi. “Ka Sorkar Meghalaya ka la ïatreilang bad ki lai tylli ki Autonomous District Council (ADC) ban buh jingthoh noh ïa baroh ki riti dustur bad deiti tynrai jong ki paid riewlum ka Jylla” ula pyntip.
Ula pynpaw ruh ba ki Jylla bapher bapher jong ka thaiñ Shatei Lam Mihngi namar ka jingdon bun ki Jaidbynriew ha ka, ki la mad ïa ki jingeh ba bun rukom bad ka dei lyngba ki prokram bad ki forum ba kum kine ba ka thaiñ ka lah ban ïeng rasong halor kine ki jingeh bad ba lah ban pynlong ïa ka kum ka thaiñ kaba khlaiñ.
“Nga pang mynsiem ban ïohi ïa ka jingjia ha Manipur bad nga kyrmen ba ka forum kum ka NEIPF kan shimkhia ïa kane ka kam ha ka ban lah wanrah pat ïa ka jingsuk ha Manipur khnang ba ngin lah ban jam shakhmat bad ïoh ïarap ïa ki jaidbynriew bapher bapher ha kane ka Jylla” ula ong.
U Conrad ula ai jingmut ruh ba ka Forum kum ka NEIPF nalor ka jingshimkhia ïa ki ishu bapher bapher jong ki paid riewlum, ka dei ruh ban wad jingtip, wad bniah bad buh jingthoh ïa ki jingnang jingtip bad ki jingleh tynrai (knowledge & Practice) jong ki paid riewlum kaba don shibun ban tyrwa sha ka pyrthei.
“ïa kane ka spah jingnang jingtip dei ban ai pateng sha ki samla jong ka pateng ban wan bad ban sam ruh sha ka pyrthei baroh kawei” ula ong.
Shuwa kane, u Myntri Rangbah ula pyllait ruh ïa ka kot “Indigenous 2023” ha kane ka prokram. Ki kynhun bapher bapher na ki Jylla ka thain Shatei Lam Mihngi kila wan iashimbynta ha kane ka jingrakhe.