Nongpoh, Naiwieng 13: Ka Confederation of Ri-Bhoi People (CoRP) kala pynpaw ka jingsngewkmen kaba khraw halor ka jingwan ka tamasa Cherry Blossom ha Bhoirymbong namar ka jingwan kane ka tamasa kana wanrah ka jingmyntoi kaba bun ïaki khun samla bad ki paidbah nongshong shnong bad wat kiba nabar kiba wan ban buh dukan ha katei ka jaka bad khamtam ka jingiohkam iohjam ki khun samla.
U Bah Bandari Ryntathiang President ka CoRP u la ong ba kum ka seng ka ai ka jingïaroh ïaka sorkar bad kumjuh ruh ka jingdon ki samla khasi kiba lah ban pynïaid ïa katei ka tamasa kaba heh ban wanrah ruh da ki nongrwai ba paw ka pyrthei bad kane ka long ka jingsarong kaba khraw.
U la ong ruh nalor ki dukan, kiba bun naki iing shong basa ki dap bad shlei ha kum katei ka sngi namar ka jingwankai jong ki nongjngohkai pyrthei kiba wan ban pynlut pisa ha kane ka tamasa bad kane kan long ka jingmyntoi bad kyntiew ruh ïaka ioh ka kot ki paidbah.
U la kyntu ruh ïaka sorkar ba kan pyrkhat lem ka dor tiket naka bynta ki nongshong shnong ban kham pynduna bad ban nym long maw jynthuh than ïa katei ka tamasa namar lada kane ka tamasa ka leit sha kiwei ki district kan long ka jingduhnong kaba khraw ïaka district hi baroh kawei.
