Wat leh Blei Khyndew” ong ka HNLC ïa u Bah Ardent Basaiawmoit

Shillong, Nohprah 22 : Ka kynhun kiengatiar bala kheiñ be-aiñ-ka Hynniewtrep National Liberation Council (HNLC) kala kynthoh ba ïa u President ka Voice of the People Party (VPP) Bah Ardent Miller Basaiawmoit, ba um dei ban saitkhuid ïa ka kam thung Syiem ka Hima Sohra bad ba um dei ban leh kum u Blei Khyndew.
U General Secretary ka HNLC Bah Sainkupar Nongtraw ha ka kyrwoh ba pynmih ha ka sngi Nyngkong, ula ong “Ngi (HNLC) tip shai ba u Mynjurlang Majaw uba la shah thung kum u Acting Syiem (Hima Sohra) u dei u briew jong ki na ka party Prah”.
“Ka HNLC kam kynriah tang shi ksai naka nongrim ba ka ïeng halor ka jingbym ai sanad ka KHADC ïa u Syiem Sohra namar ngi tip shai ba u Mynjurlang Majaw u Acting chief ba ka thung, u dei u briew jong ki naka party Prah, kumta u Ardent um dei ban saitkhuid bad um dei ban leh kum u Blei khyndew” ong ka kyrwoh.
Kat kum ka jingong u Bah Sainkupar, “ Ngi don ka hok ban tuklar ,bad ka hok jong ka jaidbynriew kaba phi hap ban siew ka long kumba phi bet kumta ruh phin sa ot”.
“U David bashisha um ju put turoi ïalade ha camera shuwa ban leit sha thma. Lada ka por ka lah khot wat u david thok(false david) ruh u hap long langknia” ula bynrap.
Ka HNLC kala pynkut da kaba ong “Ka kot ba ka HNLC kan sa pynmih shen kaba kyrteng “The Blueprint of Hynniewtrep” kan sa ai ka jubab ïaki ba bun ki jingkylli kynthup ïaki Artylli ki jingkylli u Ardent, nga buh kumjuh kane kajuh ka jingkylli ïa u Ardent, kum ka Jaidbynriew la u kwah ban shong ïingwai sah kumne ne u kwah ban shong ïing lajong???” .