Wat lada la pyllait ïa ki marks, ai por biang ka KSU ïa ka MPSC ban pynbeit biang ïa ki mat ba dang sah

By Mawphor Editor On Jan 29, 2026

Shillong, K’ Lyngkot 28: Ka Meghalaya Public Services Commission (MPSC) ha ka sien kaba nyngkong ka la sdang ban pynlait paidbah ïa ki marks jong ki samla ki ba pass ïa ki eksamin kam hadien ka jingdawa jong ka Seng ban pyntreikam ïa ka kaiphod treikam (report) ba la bthah da ka “MPSC Reforms Committee, 2025”.
Katkum ka kyrwoh khubor na u samla Reuben Najiar uba dei u Asst. General Secretary uba dei ruh u Chairman, Employment Monitoring Cell jong ka Khasi Students’ Union (KSU) u la pynpaw, Ka Seng ha 19 tarik u Kyllalyngkot, 2026 ka la phah dorkhas bad la maham ba ka Commission kam dei ban pynslem shuh ban pyntreikam ïa kane ka report bad ka la ai por shi taiew ïa ka MPSC ban pynbeit pynbiang halor kane ka bynta bad na ka liang ka MPSC ha 23 tarik u Kyllalyngkot, 2026 ka la pynlait paidbah ïa ki marks jong kiba pass bad ioh kam jong ka post Sub Inspector of Statistics under Directorate of Economics & Statistics.
“Kane ka long ka sien kaba nyngkong ba ka MPSC ka pynlait paidbah ïa ki marks bad ka long kum ka sienjam kaba nyngkong sha ka jingthung kam thung jam kaba khuid” ong u samla Reuben.
Na ki mat ba don ha ka report na ka liang jong ka MPSC ka la lah ban pynurlong ïa katto katne tylli ki mat kiba kynthup ban pynlait ïa ki answer key (jubab jong ki jingkylli hadien ka eksamin) bad ban ai por ban pyrshah lada don kano kano ka jingbakla, jingthaw ïa ka Grievances Cell ban ujor lada don kano kano ka jingbakla bad ha ka sien kaba nyngkong ban pynlait paidbah ïa ki marks bad kiwei ki mat kiba rit.
U samla Reuben u la ong, ka Seng kam pat hun katba baroh ki mat kiba don ha ka report kim pat treikam lut.
Katkum ka report, ka MPSC kam dei ban pynmih tang ïa ki marks jong kiba pass hynrei jong baroh ki bym shim pass ruh bad ka MPSC kam shim la leh ïa kata. Halor kata, kiwei ki mat ba ka MPSC kam pat pytreikam ki long ha ki eksamin dei ban ai carbon copy jong ki OMR sheet sha ki nongthoh eksamin ba kin ioh ban tip bad ïanujor ban nym don ba leh tuh bad ki marks ka jong ki.
Sa kiwei ki mat ki long, Ban pynlait paidbah ïa ka jingdon jingem (declarations of assets & liabilities) man la u snem jong baroh kiba trei ha MPSC ba kynthup naduh u Chairman, ki members bad kiwei khnang ban lah ban teh lakam ïa ka jingbam sap.
Kaba lai kadei ban pyntip ïa ki marks jong ka personal interview lada don, bad kaba saw kadei ban pynlait paidbah ïa ka kaiphod treikam (Annual Report) jong ka MPSC bad kaba san kadei ban don ka Annual Calendar ka ban pyntip ïa ki nongwad kam halor ki tarik advertisement, eksamin bad result na bynta baroh shi snem bad kaba hynriew ka long ïa ka jingpynkylla ha ki rukom shim interview bad ka mat kaba hynniew kadei ba ki Advertisement kam ka dei ban dei thik tang ïa ki nongshong shnong ka jylla bad kiwei kiwei ki mat.
Na ka liang u Chairman ka MPSC hadien ka jingkut noh ka jingbuh por kaba shi taiew na ka liang ka Seng, u la pan por sa katto katne sngi ban pynbeit pynbiang ïa kiwei ki mat ba dang sah namar ka jingbun ki shuti ha kine ki 7 sngi.
Ka Seng kan ai por sa katto katne sngi ïa ka MPSC ban pynbeit pynbiang ïa ki mat ba dang sah hynrei lada ym don ki jingkylla kiba biang na ka liang ka Seng kan shim ïa ki sienjam kiba kham eh pyrshah ka MPSC bad lada donkam ban pynsangeh ruh ïa ki eksamin baroh ban nym don ki jingthep tuh bad jingleh tuh katba kine ki mat ba don ha ka report kim pat treikam.