Wat la sniew ka surok bad bun u dewïong, dang don ka spah ba dang buhrieh ka thaiñ Maweit

Shillong, Ïaïong 19: Ka thaiñ Maweit, baroh shi katta la ju bna kum ka thaiñ kaba riewspah ha ka liang u dewïong, ha kaba ka don u dewïong uba da ki million ton.
Hynrei khyndiat eh kiba tip ba kane ka thaiñ ka riewspah ha kiwei pat ki spah mariang.
Kane ka thaiñ kaba ka surok haduh mynta ka long kum ka surok kulai, ka don ki ïa ki wah bad ki kshaid kiba itynnad ba kine ki wah ki long ruh ki jaka khwai kiba ki briew ki ju sngewtynnad ban leit khwai.
Kawei na kine ki wah kadei ka wah Rwiang, kaba wan tuid na Wah Rwiang ha ka surok na Shillong sha Riangdo. Haduh katei ka bynta ban ïaid pat na Nongstoiñ sha Maweit, bad lad na ka Shnong Nonglyngdoh, ka don kane ka wah, kaba ki briew ki ju leit khwai.
Kane ka wah ka long kaba itynnad bad dap da ki mawsiang bad ki maw kiba khuid bha. Ka um kaba tuid ha kane ka wah ruh ka long kaba khuid bad sngur khlir khlir. Ym i lah ngeit ba kane ka thaiñ yn don ki krem ne ki jaka tih dewïong.
Ha kane ka wah mynta la shna ïa ka jingkieng kaban leit na Nonglyngdoh sha Nongshyrkon, Porla bad kiwei kiwei de ki jaka.
Kaba sngewtynnad ka long ba kane ka wah ym tang ba ka don ki dohkha ki dohpnat kiba heh, hynrei kaba ki briew ki sngewtynnad eh ban leit khwai na kane ka wah ka long ban khwai doh sher.
Namar ka jingdon ki mawsiang bad ki maw ha shilynter ka wah, u sher ruh u juh bad shong bha bad dei ha ki jaka kiba kum kine ba ki briew ki ïa noh ban leit khwai sher.
Nalorkata, kane ka wah, ka don ki thwei kiba itynnad kiba la long kum ki pung sum bad pung ban jngi lane kita ki natural swimming pool. Kine ki thwei ki long kiba jylliew tangba ki khuid bha pat.
Ban kiew arted ïa kane ka wah, ka long kaba shitom haduh katta katta namar ka jingdon ki maw kiba heh bad ki jaka ba long riat. Ki briew kiba leit khwai sha ki jaka kiba kham jngai ne kham shaneng jong ka wah, ki pyndonkam da ki bur. Ki bur kidei ki kynja lieng ban pynper ha sla um, ha kaba la shna da kaba shu teh song ïa u siej bad sa ñiah tang da uwei u briew.
Namarkata ka daw ka long kaba donkam ba ki paudbah kin ri tyngkai ïa kane ka wah bad khamtam eh ïa ki doh um doh wah kiba don ha ka. Ym dei ban ailad ïano ïano ban shu leh lalot da kaba shoh da ki dawai ne kiwei pat ki rukom. Nangta ym dei ban ailad ruh ïa kino kino ki jingtih dewïong ban pyntuid ïa ka khyndew bad kiwei pat ki jaboh sha kane ka wah.