Wat la ki shong ha ïingtrep ïingskum ki ïabeh ban pynnang pynstad ïa la ki khun ki kti

Nongstoiñ K’lyngkot 15: Ki paitbah nongshong shnong ha kine ki sngi la ki dei na ki shnong kiba kyndong tam bad ki bym don ïa ka spah ka phew kum kiwei hynrei ki la sngewthuh ïa ka jing kordor jong ka jingnang jingstad bad ki la iabeh ban phah skul ïa ki khun ki kti wat la ki hap ban trei shitom miet la bad sngi ban shah ïa u slap , ka lyer na ka bynta ban pynnang pynstad ïa ki khun ki kti jong ki.Ha ki taïew ba la dep u nongthohkhubor u nongthohkhubor u la poi ha kawei na ki nongkyndong ha kaba ki dang don bun tylli ki ïng kiba dang sop da u phlang bad ker da ki tyrpait .Ha katei ka sngi la ïoh ban ïakren bad ki trai jong katei ka ïng ha kaba ki la ong ba wat la ki shnong ha kaba kum katei ka ïng kaba la sop da u phlang hynrei kim ju khuslai namar ki im da ka rep ka riang, u kba une kyrhai, u phan karo, u phadieng, ki jhur ki jhep bad kiwei kiwei.Ki la iathuh ruh ba ki don sanngut ki khun laingut kiba la heh kiba la leit pule sha kiwei pat ki jaka bad arngut kiba dang kham rit kiba dang leit skul ha shnong.Ki la ong ruh ba kum ki kmie ki kpa wat la kim dei kiba la nang la stad namar kim shym la ïoh ban leit skul ha ka por ba ki dang rit namar ka jingban jong ka jingduk ïa ki kmie ki kpa jong ki hynrei kat kum ka jingïaid ka por ki sngewthuh ba ka jing nag jingstad ka long kaba don kam haduh katta katta na ka bynta ki khun jong ki.Kumta ki la hap ban trei shitom ban pynnang pynstad ïala ki khun.
Kitei ki shitymmen ki la ong ruh ba ki tip shai ba ha kane ka juk ki samla kiba la nang la stad kiba la pyndep ïa ki jingpule bapher bapher ki shem jingeh ban ïoh kam hynrei na ka liang jong ki pat kim khmihlynti satia ïa ka kam sorkar hynrei ki pynshlur pat ïa ki khun jong ki ba ynda ki la pyndep ïa ka jingpule ki dei ban ïaleh katba lah ban ïeng hala ki kjat da kaba seng ïa ki kam la jong la ka long ha kan kano ka jait kam ruh.KI la ong ruh ba ha ka por ba ki khun ki wan sha shnong ha ka por shuti ki ju hikai ïa ki kumno ban rep ban riang, ban trei ban ktah khnang ba kin sngewthuh haduh katno ka kmie bad u kpa ki shitom ha kaban pynheh pynsan bad pynnang pynstad ïa ki .U kpa jong katei ka long ïng u la ong ruh ba teng teng haba u poi ha ki jaka sor bad shong ïathuhkhana bad ki para lok u sngew lehraiñ ban pyrkhat ïa ka ïng ka sem la jong hynrei haba u pahi sha ka jinglong jong ki khun u sngew sarong pat namar haduh mynta kim pat saitlah ïa ki jingsngeng jingkraw jong u kum u kpa bad ka kmie jong ki.U la ong ruh ba bunsien u ju ïoh sngew ïa ki khana ba ki khynnah bad ki samla kiba ngop ha ki kam sniew khamtam eh ha ki jingdih pynbuaid ki dei ki khun jong kiba don ba em kiiba shong ha ki jaka sor bad haba u pyrkhat u sngew suk bad hun ka mynsiem haba shong ha nongkyndong .Kaba kham sngewtynnad ka long ba utei u long kpa u la ong ba bun bah ki riewstad, ki riew shemphang bad ki riew khraw ki mih na ki long ïng kiba duk kiba shong ha ki nongkyndong kum ma u.Nalor kata u la pynkynmaw ruh ba sanphew snem mynshuwa kumba marshiteng na ki ïng ki sem hapoh West Khasi hills district ki dang dei ki ïng sop phlang ,ker da ki tyrpait bad kiba bun ki ïng kiba la sop da ki tin bad ker da ki lyntang ki la dei ki ïng sorkar bad ki ï jong ki heh saipan pynban ki heh sorkar, ki riewstad bad ki iew shemphang kiba la kiew kyrdan ruh ban long ki nongsynshar ki mih na kiba kum kitei ki ïng ym na ki ïng paki dulan