Shillong, Nohprah 22: Ka seng Hindu-Kutumba Surakshya Parishad (KSP) na Assam, dangshen ka la byrngem ban pynlong ïa ka jingïakhih ha Byrnihat la 24 tarik Nohprah namar ka jingbym urlong ka jingdawa ban plie ïa ka Krem Mawjymbuiñ ban lehniam ki paid Hindu kaba ki la angnud la slem bha.
La ong ba ka KSP kaba la buh ïa ka 23 tarik Nohprah kum ka por ba khatduh ïa ka Sorkar Jylla ba kan pynbeit ïa ka jingïalang bad baroh ki kynhun nalor ban pynbeit ïa ka jingleit jurip jong ka kynhun sha Krem Mawjymbuiñ.
Lah ruh ban ong ba kane ka Seng ka la byrngem ban pynlong ïa ka jingpakhang surok ha ka 24 tarik Nohprah ha ka thaiñ Byrnihat.
Ka krem Mawjymbuiñ kaba la pawnam ïa ka jingdon u Mawjymbuiñ ba ïasyriem kum u mawlehniam Shiva, ka dei kaba la khang ïa ki paid Hindu ban wan lehniam naduh u Nailar 2024 hadien ka rai jong ka Dorbar Shnong Mawsynram.
Shuh shuh ki artylli ki seng Hindu ba kynthup ïa ka Sanatani Gagrata Prahari bad ka Hindu Surakshya Sena, kila pynthikna ïa ka jingïashim bynta lang ha kane ka jingïakhih jong ka KSP.
La ong ba u President ka KSP Satya Ranjay Borah ha ka kyrwoh ula pynthikna ïa ka jingwan ïashimbynta lang kine ki artylli ki seng.
Na ka liang u Borah ula ban jur ba kane ka jingïakhih ka dei ka hok ban pynlong katkum ka riti synshar ka ri bad ka dap ban pyni ïa ka jingaiti lut ha ka ban pynneh ïa ka dustur hiar pateng, kumba la kdew ha ka Article 51(A) jong ka Riti Synshar ka Ri India.
“Kane ka dei ka jingkyrpad ba khatduh jong ngi ïa ki bor khmih ba kin pynbeit ïa ka jingïalang na ka bynta jong ngi bad ki kynhun bapher bapher bad ban pynbeit ruh ïa ka jingïaleit jurip sha krem Mawjymbuiñ hapoh ka por ba la buh. Ngi la leh ïa la ka kamram jong ngi kat kumba la pynkup bor ha ka Article 51(A) jong ka Riti Synshar ka Ri India,” ong u nongialam ka KSP.
Ula ong ba ha ri synshar paidbah kum ka India, la don ïa ka hok ban pyni ïa ka jingpyrshah ha kano kano ka bynta jong ka Ri kaba dei halor kano kano ka kam.
“Ngi kwah ban phah ïa ka jingkyrpad jong ngi sha u ophis u Myntri Rangbah ka Meghalaya ba kin khmih ïa kane ka kam bad ban leh ïa kaba donkam ban leh kham kloi kat kaba lah. Lem kumta, ngin pynlong ïa ka jingïakhih jong ngi ha Byrnihat ha ka 24 tarik Nohprah” ula bynrap.
Lah ban pynkynmaw ba na ka liang kiba bun balang ba kynthup ïa ki sengbhalang, ka KHADC bad kumjuh ruh na ka liang ka sorkar jylla ka la pynpaw ïa ka jingpyrshah halor kane ka jingthmu jong ka KSP ban pynlong ïa ka jinglehniam hapoh ka krem Mawjymbuiñ bad ki la kyntu ruh ïa ka ba kadei ban pule bniah ïa ki riti dustur bad ki aiñ bat khyndew ha kane ka jylla.
