Wat la bun ki niam bad ki Jaidbynriew, ïoh jingiaroh ka Mawbah ba tylli kum ka shnong

Shillong, Nailar 21 : Ka shnong Mawbah ka la ïoh ïa ka jingïaroh kaba khraw namar wat la ki don bun ki Jaidbynriew bad ki Jait niam bapher bapher hynrei ki bor shnong pat ki lah ban pynïatylli bad tehlakam ïa ka shong suk shongsaiñ.
ïa kane ka jingïaroh la ai da u Bah Mitchel Wankhar MDC ka Laban Mawprem haba plie paidbah ïa u mot dur Jisu ba la shna pynitynnad shuh shuh da ka Dorbar Shnong Mawbah lyngba ka jingkyrshan pisa kaba u la pynioh na ka skim MDC.
Ha kane ka sngi nalor u rangbah Shnong Bah David Syiemlieh nangta Secretary shnong bah Ariston Thabah la donlang ruh u Phadar Rangbah ka Mawprem Parsish Fr. Edwin Kahit nalor ki nongshong shnong.
Hashwa ban plie ïa une u mot dur Jisu la ïoh ruh ia ka jingduwai na u Fr. Edwin Kahit uba la ai ka jingkyrkhu ba ka jingdon jong utei u motdur un wanrah ka jingshngaiñ ïa ki nongshong shnong.
Na ka liang u Bah Mitchel u la pynpaw ka jingsngewkmen ban ïohi ïa ka jingïatylli ha katei ka shnong, namar watla ka dei ka shnong kaba khleh jaidbynriew nalor ki jaitniam bapher bapher hynrei ki nongïalam shnong ki lah pat ban teh lakam ïa ka shong suk shongsaiñ bad wanrah ruh ka jingïatylli.
“Kane ka jingwan lang jong baroh ki jaitniam ka pyni ïa ka jinglong laitluid ha ri India ban mane Blei laitluid bad kan long ruh ka jingsneng ïa kito ki nongialam kiba shim ïa ka niam kum ka sainpyrthei,” u la ong.
Nalorkata u la ïathuh ba un ïai bteng ruh ban ïa treilang bad ki nongïalam shnong nangne shakhmat na ka bynta ki kam pynroi kum u MDC.
Ki nongïalam shnong ki la pynpaw ka jingkmen ba wat la ki don tang khyndiat ngut ki para doh para snam hangtei hynrei ka jingïatreilang kaba ki ïoh na u kum u MDC ka la ai mynsiem lang ïa ki ban trei. Ha kane ka sngi ki la pynpaw ruh ka jingsngewnguh ïa u MDC uba la noh synñiang bad kynmaw ïa ki nongshong shnong ha ka por ba wan syllad ka khlam COVID.