Wat kynnoh Seng dkhar, namar ngi la ïakhih ha Parliament halor ka Ktien Khasi

Sohra, Naiwieng 08: Ka Seng Trinamool Congress Meghalaya ha ka 5 tarik mynta u bnai, ka la hiar sha Sohra na ka bynta ban pan jingkyrshan ïa u Kyrtong jong ka Seng, u Bah Harold Khongsit.
Ïa ka jingïalang la pynlong ha Maraikaphon ha kaba u President jong ka TMC Meghalaya, u Bah Charles Pyngrope u la don lang. Nangta la don lang ruh u Bah George B. Lyngdoh, MLA jong ka Umroi, ki nongïalam jong ka Mahila Trinamool Congress Meghalaya bad kiwei kiwei.
Haba kren ha kane ka jingïalang, u Bah Charles Pyngrope, i la ong ba um sngewthuh balei ba ki don kiba kynnoh ba ka TMC kadei ka Seng dkhar, haba ka la shim pat ïa ki ishu kiba donkamn bha jong ka jylla Meghalaya. Kum ka jingithuh noh ïa ka ktien Khasi ha ka khyrnit kaba phra jong ka riti synshar ka ri India. “Ki MP jong ka TMC ki la pynlong ka jingïakhih wat ha Parliament ban dawa na ka sorkar India ban ithuh noh ïa ka ktien Khasi”, la ong u Bah Charles.
U la ong ruh ba ka TMC kadei kawei ba ki Party kiba don bun ki MP ha Parliament bad ka jingdon jong ki kan ïarap shibun ban pynsngew ïa ki jingeh ka jylla Meghalaya ha Parliament.
U Bah George ha ka jingkren jong u, u la ong ba ka Sohra kadei ka thymmei jong ka jingnang jingstad ka thoh ka tar bad ka pule puthi, ka donkam ban sei ïa ki nongmihkhmat kiba lah ban ïakren bad ïasaid ha Ïingdorbar Thawaiñ. “Lada ki nongmihkhmat kim lah ban ïasaid ha ïingdorbar ne mano pat ban ïasaid na ka bynta ki jingeh jong ki?”, la ong u MLA ka Umroi.
Shuh shuh u la ong ba ka TMC kan ïakhun pyrshah ïa ka jingsynshar donbor ka BJP ha Delhi, ha kaba ïa kine ki kam leh donbor jong kane ka Seng ba bat ïa ka jingsynshar ha ri India, ha kaba ïa ki kam leh donbor jong ka, ki paidbah ki la sdang ban sngewthuh haduh kane ka jylla ruh, naduh ha ki shnong ki thaw bad wat ha ki ïing ki sem bad ki jingmane blei ruh.
U Bah Harold Khongsit, uba la shongthait kum u Assistant u la ong ba naduh ba u dang khynnah u la bam ïa ki lyer pyngngad kum jong ka ri Sohra bad um sngew nongwei shuh wat lada bun snem u la jah na la ka shnong namar ka jingleit shakri jong ki ha ka kam sorkar. U la ong ruh ba kum u shakri sorkar u la pyrshang katba lah ban shakri ïa u paidbah. Hynrei mynta ba u la shongthait na ka kam sorkar u la kham ïoh por ban shakri khambha ïa ki paidbah khamtam jong ka thaiñ Sohra. U la ong ba ka Sohra ka dang donkam shibun ki kam pynroi naduh ki surok, ki lynti ki syngkien, ka umsam umdih bad kiwei kiwei.