Shillong, Nailur 14: Ka kynhun ki nongshad nongrwai bad ki riew donsap ha ka jylla hapoh ka jingïalam ka All Meghalaya Dancers Association(AMDA) ha ka sngi Balang ki la pynlong ka jingïakhih ba lyngkot jongki ban dawa ba ka sorkar ka dei ban pynurlong noh ïa ka jingdawa kaba ka AMDA ka la dawa naduh u snem 2003 ban ai jingkyrshan pisa ïa ki riew donsap bad ban buh ki institute na bynta jong ki ym ban kynmaw nongshad nongrwai tang ha ka por ilekshon.
Haba kren bad ki nongthoh khubor u Bah Kitbok Thabah Prresident ka AMDA u la ong ba ka sorkar kam dei ban dang leh khiew ja kai ïa ka lawei ki samla donsap hynrei ban ïarap ïa ki ym ban kynmaw wad nongrwai ne nongshad tang ha ka por ilekshon ban pynbyrngia ïa u paidbah ha ka rynsan ïalap ilekshon jong ki.
U ong ruh ba kumba ka sorkar ka la tyrwa ban shna ïa ki ïing bun mala na bynta ki Harijan ka dei ban shna lem ïa ki nongshad nongrwai ba kin ioh ban pynkhreh bad shah hikai ha ki nonghikai jong ki.
“Ka kam shad kam dei ba ki tang shu khot na lum ne na lynti synkien ngin lah ban leit shad ban ioh khusnam hynrei ngi donkam ban da hikai janai bad jin lada ngi ioh a ka institute lajong kane kan ïarap shibun ïa ngi” u la ong.
U la ong ruh ba ka sorkar ka dei ban ai jingkyrshan pisa sha ki riew donsap kiban leit ïakop sha ki rynsan bapher bapher namar kiba bun hi ki riew donsap ki shu kut noh ka lynti ïaid na ka daw ka jingbym don pisa.
“Bun ki samla kiba ïoh leit ïakob sha kylleng ki bynta ka ri hynrei namar ki wan na ka ïing ka sem ba duna ka ïoh ka kot ki duh nohh ka kabu ban sei pyrthei la ka sap” u la ong.
“Wat la ka AMDA ne ki seng bad ki association kin kyrshan ïa ki riew donsap naei kin ïoh pisa namar ka sorkar kam ju ïarap ïa ki bad kaei kab ki ïarap ruh ka dei na pla lajong ki dkhot ka seng bad ka jingnoh kylluid mynsiem ki katto katne ki nongleh bha” u la bynrap.
