Nongstoiñ, Risaw 03: Ka District Swachh Bharat Mission Gramin, West Khasi Hills District, ha ka sngi balang jong ka taïew ka la pynlong ïa ka Swachha Hi Seva na ka bynta ban rakhe ïa ka Swachh Bharat Divas ha Nongstoiñ West Khasi Hills District.
Ïa katei ka jingïalang la long ha Bishop Hall Nongstoiñ, ha kaba u MLA ka Rambrai Jyrngam u R.G Momin u la long kum u kongsan, ha ryngkat ka jingïadonlang ruh u bah A. Lartang SE ka tnad PHE Western Circle, ki nongtrei ka DSBM, ki paidbah bad kiwei kiwei.
U kongsan haba ai jingkren ha ka jingïalang u la ong, “Wat pan wat kylli phi ba ka ri ka lah ban leh aiu na ka bynta ka jong phi. Hynrei dei ban kylli kaei nga lah ban leh na ka bynta ka ri ka jong nga. U Blei u la ai ha ngi ïa ki kti ki kjat ka met ka phad kaba biang, kumta ki dei ban leh eiei na ka bynta ban noh synñiang ïa ka imlang ka salang”.
Shuh shuh u la ong, “Kumba ngi ju bam ju dih ïa ki jingbam jingdih kiba khuid ba suba. Kumta kaei kaei kaba ngin leh ha ka jingim kan long ruh kaba khuid ba suba, khamtam ban sumar khuid ïa ka mariang bad ïa ki sawdong sawkun. Kum ki briew ngi dei ban don kata ka jingshemphang ha lade ban leh bad sumar khuid”.
Katei ka jingïalang ka long ruh kum shi bynta ban pynkup burom ïa ki shnong, ki nongïalam shnong, ïa ki nongtrei mon sngewbha ka Solid Waste Management bad ïa baroh kiba la ïadon bynta ban wanrah ïa ka khuid ka suba hapoh ki shnong ki thaw bad ha ka District hi baroh kawei. Ha kane ka jingïalang la jied ruh ïa u Samla Rinaldi Kharbani kum u Brand Ambassador jong ka DSBMG.
