Wat kheit kulmar ïa ki tit khlaw lada ym thikna ïoh ngat kiba long bih: Asst. Director Horticulture

Shillong, Jylliew 23 : Ka jingbam ïa ki tit khlaw ba long bih ka la shim bun tylli ki mynsiem jong ki nongshong shnong ka jylla man u snem bad kane ka dang ïai bteng mynta u snem ruh ha kaba i khunlung ba dang rit ruh i la ngat lang ha katei ka apot.
Kumta, halor kane, na ka liang ka tnad ka Koit ka Khiah kumjuh ruh na ka tnad Horticulture jong ka sorkar jylla ki la mih shakhmat ban pynshai sha ki paidbah ba katlah katïai ki dei ban kiar ban leit kheit ïa ki tit khlaw lada kim pat tikna ba ki dei kiba long ban bam.
Halor kane la ïoh ban ïakren bad u Bah K Kharpran, MAS, Asst. Director ka tnad Horticulture, Mushroom Development Centre, Upper Shillong uba la ïathuh ba naduh hyndai ki mei tymmen pa tymmen ki la hikai bad kdew kiba kumno ki tit kiba long ban bam bad ki bym long ban bam. “Hynrei mynta ka la don noh ka jingdkoh ban tip ïa ki tit ba long bam bad kino bym long ban bam. Kito kiba tip ki kheit beit tang ïa kito kiba long ban bam bad kiar na kiwei pat.”
Shuh shuh u ong ba ki tit ba ju boi ki khniang ne ki wieh kidei ki tit ba long ban bam nalor ba ki don ka jingsma iwbih bad kito kiba don jingat ne kynja sati ha kito ki tit ka pyni ba ki long bih.
La ïathuh ruh ba kito ki tit ba long bih ki kham phalang katba kito ki ba long bam ki kham dum rong. Watla katta u ong ba kam long satia pat kaba shngaiñ ba shu kheit madei mata khlem da tip tikna.
La ïathuh ruh ba ki don haduh kumba 18 – 20 tylli ki jait tit kiba long bad shngain ban bam kum u tit thnaw syiar, tit lbong hati, tit dud, tit sia bad kiwei kiwei.
“Kine ki kyrteng ki don la ki jong ki kyrteng ha la ki jaka jaka bad kine kiba ju kheit tit ki tip. Kumta na bynta kito ki bym ju kham leit ki dei ban da peit bha bad long kiba phikir bha bad ban da ïalam bad kito kiba la tip bha,” u la kyntu.
Shuh shuh u la pynkynmaw ruh ba ki riewtymmen ha shwa ban shet ïa u tit ki ju ong ba die ban pdem mluh kumba shiteng kynta lane don kiba thang da u nar saw. Une u heh sorkar u ong ruh ba barabor hi haba shet tit ki ju ai lang ruh ïa u sying.
Nalor kane, u Bah Kharpran u la ong ruh ba ki paidbah ki dei ruh ban husiar namar ki don ruh ki jait tit kiba sniew kiba syriem kum ki tit ba long bam bad kumta hap ban long husiar bha haba leit ban kheit tit sha khlaw sha btap.
Kumta, u ïa ki paidbah ba shwa ban shet dei ban sait bha hadien ba la dep pdem mluh bad dei ban kynmaw ïa u sying ban shet lang. “Dei ban tikna 100 na ka 100 shwa ban kheit ïa u tit khlaw bad rah sha ïing ban shet.”
Shuh shuh u ong ban lait na ka jingsyier bad ban lait na kaba bam ïa ki tit buid bad tit ba long bih, na ka liang ka Mushroom Development Centre, ki pynshlur ïa ki nongrep ba kin phai khmat ruh ban rep tit (tit farm) ha ki ïing ki sem, la ka long ban bam hi ïa lade ne ban die, namar ka kam rep tit kam dei kaba lut shibun ka pisa lane kaba bam por.
Lah ruh ban kdew hangne ba dang shen, na ka liang ka ophis treikam jong u Director ka tnad ka Koit ka Khiah ka jylla ka la kyntu ïa ki paidbah ba ki dei ban kiar na kaba bam ïa ki tit khlaw ha ka por slap.
“Ka jingbam ïa ki tit khlaw ka long kaba ma shibun. Don ki tit kiba don ïa ka bih kaba lah ban pynïoh pang ïa phi. Ka State Surveillance Unit jong ka Integrated Disease Surveillance Program (IDSP) ka la lap ba ka don ka jingkiew; kine ki jingjia ki kham jia ha ki bnai slap naduh u Jymmang haduh u Risaw,” ong ka kyrwoh khubor na ka tnad dang shen.
Shuh shuh la batai bñiah ruh ba kito kiba ïoh pang na kaba bam ïa kitei ki tit khlaw ki ïoh ïa ka jingpang sniew kpoh kum kaba kynroi, prie, pang ki dohksah. La ong ruh ba ha kito kiba kham jur, ka don jingmih syep, kren ruma, ym tip briew bad sniew u dohnud.
Kumta, na ka liang ka tnad ruh ka ïai ban biang ba lada ym tikna hi dei ban kiar lai-lum lai-wah ban bam ïa ki tit khlaw bad ban tip ruh nangno kheit namar ïoh ki tan ïa ki kynja bih na ka mariang.