Katba nang jan ka Election, katta ka la nang paw penryngkew ka jingkren kulmar ki nongïalam jong ngi khamtam kito kiba bat bad synshar ïa kane ka sorkar MDA mynta. Kawei na kaba ktah eh ïa ka jingsngew jong ki nongthep vote ka dei ka jingkren jemdaw bad ñiewbeiñ uwei u nongïalam ba radbah jong kane ka Sorkar MDA uba long ruh u nongïalam bahakhmat jong ka party NPP kaba bat mynta ïa ka bor Sorkar ha Meghalaya.
Ka jingphla jong uwei u nongïalam ka party NPP ha kawei na ka jingïalang jong party kaba la pynlong dangshen ha Mawlai constituency ba ‘ki kyrtong (candidates) barabor ki ju mlien ban pynbiej ïa ki paidbah man ka Election bad ki nongthep vote ruh ki shah pynbiej lem manla ka Election’ ka la ktah mat iong hi plak ïa ka burom ka ijot jong ki nong vote.
Ki nongthep vote ki ladei ban sngew poh bad sngew jah burom hi khait halor ka jingshah ñiew beiñ bad kheiñ dewthala jong ka jingkren jem daw ki nongmihkhmat jong ki. Lehnohei ki vote ba kordor, bahok bad ba laitluit jongki ha kum kine ki jait nongmihkhmat jong ki. Lehnoh ei ka synshar paidbah (democracy) ba la pynkhamti da ka aiñ ïa ki paidbah nongthep vote jong ri India baroh.
Ka jingphla utei u nongsynshar ka Sorkar MDA ba u MLA u ju mlien ban pynbiej man;a ka Election bad ba ki paidbah nongthep vote ruh ki shu ngeit bad kohnguh beit manla ka por ka pyni shai kdar ïa ka jinghiar dor bad tad dor ki nongthep vote hakhmat kiwei kiwei ki Constituency bapher bapher jong ka Jylla.
Ki nongthep ki ladei ban lehraiñ, jah burom bad jem daw ba ki vote ba kyrpang jong ki la shah pynbiej ei khamakha ha ka jingpynbiej kai kine ki MLA manla ka por Election.
Kane ka pyni ruh ba ki nongthep vote kim pat long kiba stad ne kiba sian. Ka pyni ba ki dang sahdien bad dang tlot ha ka bor pyrkhat pyrdaiñ jong ki ha ki liang baroh. Mynta la ïa tip paidbah ïa ka dor jong ki paidbah nongthep vote ha kito ki Constituency ba ki mihkhmat.
Ha ka jingshisha, phi lah ban thok ne pynbiej ïano ïano shisien arsien hynrei ym dei pat bunsien. Ym dei tang kumta, hynrei barabor, ngi ju kylla long ki briew kiba sian bad bastad hadien ba ngi la mad ïa ka jingshah thok bad shah pynbiej ïa ngi da ki riewthok ne riew shukor ïa ngi.
Ki paidbah ka jylla Meghalaya kim dei shuh ban shu shaniah kulmar nangne shakhmat ïa ka jingkren pynbiej jong kine ki nongïalam.
Kane ka phalang ruh ba imat, wat ki mat ki jura ba kongsan jong ka jaitbynriew ruh kum ka jingpynkynriah ïa ki Khar mator (Harijan) na Them Iewmawlong,k i jingpynbiej ïa u pud u sam bad ka Assam, ka jingshah pynbiej ki sengbhalang ïa ka ILP bad Ktien Khasi ha ka 8th Schedule, ka jingkhaïi be-aiñ ïa u dewïong, ki kam bamsap ha MePCL (Electricity) bad bun bah kiwei kiwei ki mat ki lah ban long tang ki kam pynbiej jong ki nongïalam jong kane ka Sorkar MDA.
Ka long, namarkata, kaba khia shibun ïa katei ka kyntien ba la khlei bad phla da u nongïalam rangbah jong ka Sorkar MDA.
Baroh ki kynhun ne party barabor, ka shong eh ha ka jinghikai ki nongïalam. Lada u nongïalam u la hikai ban leh ïa kaba dei, kaba bha bad ba hok, kata, ki nongbud ruh ki lehraiñ bad leh hok lem. Hynrei lada u nongïalam u ju mlien ban thok bad shukor, katno tam ki nongbud ki sngew shlur bad ïoh mynsiem ban leh kham palat shuh shuh ban ïa kaba leh ma u. Lada u nongïalam rangbah jong ka party u phla bad leh ha katei ka rukom, yn nai ïakren shuh ïa ki nongïalam ba kham rit kham ria lei namar kin shlur bad ïoh mynsiem shuh shuh kham palat ban ïa kaba leh ma u.
Lada ka long ha kane ka rukom, shano ka ri bad ka Jylla jong ngi kan poi lada ngi dang shah ïalam bakla khah khah ha kum kine ki jait nongïalam kiba ju mlien ban pynbiej ïa ki paidbah nongthep vote ba shisur (innocent voters) kiba pli.
Haduh katno ki nongthep vote kin dang shah pynbiej biang ha ka Election ka ban sa long shen ha u snem 2023 ban wan? Ngin sa ïa peit ïa kata ka rukom pyrkhat bad ka rai bastad jong ki nongthep vote ka Meghalaya hadien katei ka Election.
