Shillong, Jylliew 7 : U Myntri ka tnad ka koit ka khiah bad uba dei ruh uwei na ki nongïalam ka National People’s Party (NPP) u James P.K Sangma u la bthah ïa ka Congress ba kam dei ban byrngem chargesheet ïa ka sorkar MDA khlem kino kino ki sakhi sabut kiba biang.
U James u la ong ha ka ri synshar paidbah uwei pa kawei ki don ka hok ban kren laitluid bad leh ïa kaei kaba ki kwah. “ Hynrei ban shu kynnoh khlem nongrim khlem kino kino ki jingshisha tang na ka jingmutdur shimet nga tharai kam long kaba dei khamtam na u nongïalam jongka Congress” ong u James.
“ Nga sngew ba donkam ban don khyndiat ka jingkit khlieh kum ki nongïalam ym ban shu kynnoh kulmar ne kren katba lap ba shem bad ong ban chargesheet khlem ki jingshisha.Lada phi (Congress) phi don ki sabut ïaid shakhmat namar kumba nga ong ngi im ha ka ri synshar paidbah ym ban shu heh nia na jaka shong leit sha ki bor ka aiñ namar phi long laitluid ban leh kumta” ong biang u James.
Dang ha kine ki khyndiat sngi u ma Vincent H Pala u la byrngem ban ujor chargesheet ïa ka sorkar MDA hapoh ka jingïalam u Myntri Rangbah u Conrad K Sangma halor ki jingbam klop bad bamsap jongka. U la ïathuh ba ïa kane ka chargesheet yn sa sei madan ruh ha ka election 2023. U la ong ba ki don bun kiei kiei kiba yn sei madan ïakane ka sorkar lyngba kane ka chargesheet khamtam ha kaba ïadei bad ki kam bamsap namar ka pla pisa ka sorkar ka dang thylli katba ka pla pisa jong kine kiba don ha ka sorkar MDA ka dang dap smam smam. U la ai nuksa ïa kane na ki khyrdop lum khajna beaiñ kiba mih ha ki surok bah ka jylla.
