Shillong, Nailur 22: Kan long ka khubor kaba sngew myllung ba wat hapdeng ka jingïaumsnam kaba la neh mynta la shi snem tam, hynrei ki samla pule na Manipur kila wan shakhmat eh ha ka ICAR JRF jong ka FGI-CAS 2024 ha kaba kane ka la long ka khubor ba la ai mynsiem shisha.
Lah ban ong ba ka jylla Manipur ka la mad ïa ka jingïaumsnam bad ka jingbym shongsuk shongshngaiñ haduh mynta, hynrei ki samla pule na ka jylla Manipur kila wanrah nam bad burom da kaba wan shakhmat eh ha ka JRF exam.
Halor kane, la ong ba kane ka khubor jong ka jingjop kala long kum ka jingshngaiñ ïa ki nongshong shnong ka Manipur kiba la sakhi ïa ka jingïaumsnam naduh u snem ba la dep.
Lah ruh ban ong ba ka FGI College of Agricultural Sciences ka la pynkup burom ïa kiba la wan sha ka kyrdan kaba hakhmat ha ka ICAR JRF jong ka FGI-CAS 2024 ha ka jingïalang kaba la long ha Kangpokpi, Manipur.
La seng ïa ka FGI College of Agricultural Sciences ha u snem 2019 bad naduh ba la seng ïa ka, kane ka college ka la ai ïa ka jingnang jingstad kaba paka bha ïa kane ka thaiñ shatei lammihngi baroh kawei.
U Chairman ka FGI College of Agricultural Sciences, Haokholet Kipgen ula ong, “Kadei ka sngi kaba kmen bha ïa nga namar naduh ba la seng ïa kane ka college bad ngi dang khynnah bha. Mynta ka sngi, ngi la pynkup burom ïa ki samla pule ki jong ngi kiba la wan ha ka kyrdan kaba hakhmat eh ha ka ICAR JRF jong ka FGI-CAS 2024. Ngi dap da ka jingkmen, ba watla ka don ha ka jaka kaba kyndong bha jong ka ri India bad ki briew ki shim ba ka jylla Manipur kadei kaba la shah ktah na ka jingbym don ka jingsuk jingshngaiñ hynrei ka College ka jong ngi ka la lah ban ïaid beit iaid ryntih bad kane ka dei ka sien kaba nyngkong eh ba ka college shimet kaba la seisoh bha ha ka JRF Exam bad ha kaba ïadei bad ki jaidbynriew riewlum, ka college ka jong ngi ka wan ha ka kyrdan kaba nyngkong ne baar.”
“Kane ka long kaei kaei ka bym shym la poi pyrkhat namar ka jinglong jingman hapoh ka jylla Manipur. Kum u Chairman bad u dlhot uba donkti ha kaban seng ïa ka College, nga lah mad bun tylli ki jingeh hynrei nga la klet noh ïa kitei kiei kiei baroh. Mynta ka sngi kadei ka sngi kaba nga kmen bha namar ka jingjop. Ngi lah dep ban ïakren bad ki katto katne ki kompeni na ka bynta ban pynlong ïa ka campus interview ha ka college jong ngi. Hynrei namar ba ka jinglong jingman kam pat long kaba shngaiñ bha, kim shym la treh ban wan sha ka jylla Manipur. Ngi kyrmen skhem ba hadien ba ka jinglong jingman ka la long kaba biang, yn sa pynlong ïa ka campus interview,” ong u Haokholet Kipgen, u MLA jong ka Saitu AC Constituency.
Ki la don palat 200 ngut ki briew kiba la shah pynïap bad da ki hajar ngut kiba la duh noh ïa ki ïing ki sem ki jong ki na ka jingmih jong katei ka jingïakynad hapdeng ki Meitei bad ki Kuki-Zo naduh u bnai Jymmang jong u snem ba la dep.
