Wat hadien ba shah thep 2 kol, khlem shah jem pynïakhaid ka Meghalaya bad ka Services

Shillong, K’Lyngkot 27 : Ka lahduh jong ka Santosh Trophy ha u snem ba la dep, ka Services Sports Control Board kam shym la poi pyrkhat ba ki ar kol ba ka thep ha ka kylla step pyrshah ïa ka Meghalaya kan shah pynphai bad mad pynban ïa ka nam ïakhaid da mar 2-2 kol ha ka lympung ïalehkai jong ka National Football Championship for the Santosh Trophy 2025-26 kaba long hynne ka sngi ha Silapathar, Assam.
Hapdeng ka jingïakhun kaba itynnad bha, ka Meghalaya ka la hap ruh ban mih madan tang 10 ngut hadien ba uwei na ki rangïalehkai u la shah beh noh napdeng madan 15 minit ei ei shwa ban kut artad ka por ïalehkai.
Haba phai sha ka jingïakhun, ka Services tang ha ka minit kaba 20 jong ka kylla step ka la ïoh ban pynkhih jar lyngba u Jijo Jerone bad tang hadien kumba 14 minit ei ei kata ha ka minit kaba 34 ka la ïoh biang ban thep sa shi kol lyngba u Abhishek Pawar. Kane ka kol ka la kylla long artad ka kol kaba la pynkyndit tyngeh ïa ka kynhun ïalehkai ka jylla baroh kawei.
Wat hadien ba ki la shah lamkhmat haduh ar kol ruh hynrei na ka liang ka Meghalaya tang ha ka minit kaba 45+1 ka la ïoh ban pynphai noh shi kol lyngba u Deibormame Tongper. Une ujuh u rangïalehkai u la ïoh biang ban pynkhih jar sa shisien ha ka minit kaba 64 jong ka kylla miet ban pynïakhaid syndon ïa ka jingïakhun. Kane ka jinglah jong u ban ïalehkai bha ka la pynlong ruh ba un ïoh ban khur ïa ka nam kum u rangïalehkai ba kynsai ha kane ka sngi.
Kumba long mynta ka Meghalaya ka don da ki 5 point, hynrei ka la hiar pat sha ka kyrdan kaba lai hadien ba ka Railways ka la pynliem noh ïa ka Punjab da 2-0 kol ha kane hi ka sngi. Ka Meghalaya bad Railways ki don mar 5 point hynrei ki ïapher pat ha ka jingïoh thep bun kol.
Ha ka jingïakhun sdang, ka Meghalaya ka la jop ïa ka kynhun ïalehkai jong ka Odisha da 1-0 kol katba ha ka jingïakhun pyrshah ïa ka Punjab ha ka 24tarik ka la ïakhaid mar 3-3 kol. Bad ha ka jingïakhun hynne ka sngi pat ka la ïakhaid bad ka Services mar 2-2 kol.
Katkum ka prokram ïalehkai, ha ka 29 tarik mynta u bnai ka kynhun ïalehkai ka jylla kan hap ban ïakhun pyrshah ïa ka Kerala ha Silapathar Stadium bad ha ka 31tarik pat kan hap ban ïakhun pyrshah ïa ka kynhun ïalehkai jong ka Railways.
Kumba long haduh mynta, ka Meghalaya kam pat shah rem satia bad ka don ruh ha ka jingkyrmen kaba skhem ba kan rung sha ka kylla kaba bud jong ka jingïakhun, kata sha ka quarter final.
Lada ïaid katkum ki kyndon pynïaid ïa kane ka lympung ïalehkai, tang 12 tylli ki kynhun ki rung sha ka jingïakhun ha ka group stage ha kaba la phiah pat ïa ki ha ki ar group, kata ha ka Group A bad Group B.
Na kine ki group yn jied pat tang saw tylli ki kynhun kiba hajrong eh ban rung pat sha ka kylla kaba bud ne ka quarter final kaban bud sa ka semi final bad ter ter haduh ka final.
Lah ruh ban kdew hangne ba ka kynhun ba ka Meghalaya ka lah ban pynïakhaid hynne ka sngi, kata ka Services, kadei kaba la rah ïa ka nam lahduh ha ka samoi ba la dep kaba la lah ban pynliem noh ïa ka Goa da 1-0 kol ha ka jingïakhun final kaba itynnad bha kaba long ha Yupia, Arunachal Pradesh.